زاڭسىز كوشى-قون پروبلەماسى دۇنيەجۇزىن الاڭداتادى . "Daily Express" تىلشىلەرىنىڭ مالىمەتىنشە، بريتانيادا تۋريستەردىڭ ءتارتىپ بۇزۋى جيىلەگەن. بيىل شەتەل ازاماتتارى جاساعان قىلمىس سانى بىلتىرعىدان 16%-عا ارتقان.

جالپى العاندا بۇل مەملەكەتتە ءۇش مينۋت سايىن وزگە ۇلت وكىلى قاماۋعا الىنادى. بالقان جەرىنىڭ ازاماتتارى قۇقىق بۇزۋشىلاردىڭ الدىن باستاپ تۇر. ال لوندوندا ستاتيستيكا بويىنشا، ءاربىر ءۇشىنشى ازامات ءتارتىپ بۇزادى.

بريتانيا جەرگىلىكتى پوليتسيا قىزمەتكەرلەرىنىڭ ايتۋىنشا، ميگرانتتار مەن كوشى-قون ماسەلەسى تۋىنداعان ازاماتتار ءجيى قىلمىس جاسايدى. سول سەبەپتى ەلدە كريمينالدى تۋريزم ءورشىپ تۇر.

قازاقستاندا دا زاڭسىز ميگراتسيا ءالى كۇنگە دەيىن شەشىمىن تاپپاعان ماسەلە سانالادى. بەيرەسمي دەرەككە سۇيەنسەك، زاڭسىز جۇرگەن ميگرانتتار مەن قۇقىق بۇزۋشىلاردىڭ سانى 1 ملن-نان استام. مەملەكەت ءۇشىن قاۋىپ بولماعان كۇننىڭ وزىندە زاڭسىز ميگرانتتاردىڭ ارتۋى قىلمىستىڭ وسۋىنە، جەرگىلىكتى حالىقپەن قايشىلىق تۋعىزۋعا جانە ساياسي تۇراقتىلىقتى بۇزۋعا اكەپ سوعادى. ماسەلەن، وسى جىلدىڭ ورتاسىندا استانادا جەدەل الدىن الۋ شارالارى جۇرگىزىلىپ، كوشى-قون زاڭناماسىن بۇزعان 1033 ميگرانت انىقتالدى. ولاردىڭ 828-ءى – وزبەكستان، 51-ءى – قىرعىزستان، 71-ءى – تاجىكستان، 29-ى – ءازىربايجان، 18-ءى – رەسەي، 9-ى – قحر، 14-ءى – ارمەنيا، 1-ءى – بەلارۋس، 6-ى – گرۋزيا، 5-ءى – تۇركيا ازاماتى. الماتىدا وسىعان ۇقساس ىسپەن مىڭداعان ميگرانت تىركەلگەن. قازىردىڭ وزىندە ىزدەۋ سالىنعان ازاماتتار مەن بىزگە بەيمالىم قىلمىستىق جايتتار بارشىلىق.
قازاقستاندا پايدالانىلاتىن شەتەلدىك جۇمىس كۇشىنىڭ ءبىراز بولىگىن زاڭسىز ميگرانتتار تولىقتىرادى. ولاردىڭ اراسىندا ماۋسىمدىق جۇمىستاردا ىستەيتىن، بىلىكتىلىگى تومەن ادامدار باسىم. ىس جۇزىندە ەلىمىزدە تۇركيا، قىتاي، رەسەي، ۇلىبريتانيا، ءۇندىستان، اۋعانستان ازاماتتارىنىڭ قۇقىق بۇزۋ فاكتىلەرى ءجيى تىركەلەدى. سونداي-اق، شەتەلدىك جۇمىس كۇشىنىڭ قازاقستانداعى ۇلەسىنىڭ ارتۋى دا كريمينالدىڭ ورشۋىنە نەگىزگى سەبەپ. اتالعان مەملەكەتتەردىڭ ۇلەسىنە جۇمىس كۇشىنىڭ 60%-70% پايىزى تيەسىلى.

ەگەر زاڭسىز ءىس-ارەكەتتەر مەن ءتارتىپ بۇزۋشىلارعا تيەسىلى شارالار قولدانىلماسا، ۇلتتىق قاۋىپسىزدىك قۇلدىرايدى. ونداي جاعدايدا كەيمادا-گراندي مەن دەشموكتاعىداي اسا«كريمينالدى ورتانىڭ» پايدا بولماسىنا كىم كەپىل؟!.

"The Qazaq Times"