«Bank RBK» اق اكتسيونەرى ۆلاديمير كيم. فوتو: Kazday

«Bank RBK» اق اكتسيونەرى ۆلاديمير كيم قارجى ينستيتۋتىنىڭ جارعىلىق كاپيتالىن تولتىرۋ ءۇشىن 20 مرلد تەڭگە جۇمساماق. بۇل قارجى 2017 جىلدىڭ سوڭىنا دەيىن اۋدارىلادى.  

باستاپقى كاپيتالداندىرۋ (دوكاپيتاليزاتسيا) بانكتىڭ جاي اكتسيالارىنىڭ قوسىمشا ەميسسياسى بويىنشا جۇزەگە اسادى. بانكتىڭ جاريالانعان جاي اكتسيالارىنىڭ سانىن ارتتىرۋ تۋرالى شەشىم 2017 جىلدىڭ 15 تامىزىندا اكتسيونەرلەردىڭ كەزەكتەن تىس جالپى جينالىسىندا قابىلدانعان. باستاپقى كاپيتالداندىرۋ ناتيجەسىندە بانكتىڭ نورماتيۆتىك كاپيتالى شامامەن 127 ملرد تەڭگە، بالانستىق مەنشىك كاپيتالى شامامەن 117 ملرد تەڭگەنى قۇرايدى.

«Bank RBK» اق-نىڭ كاپيتالداندىرۋ تۋرالى شەشىمدى قابىلداۋى ۇلتتىق بانك ازىرلەگەن بانك سەكتورىنىڭ قارجىلىق تۇراقتىلىعىن ارتتىرۋ باعدارلاماسىنا قاتىسۋ نيەتىمەن بايلانىستى.

ايتا كەتەيىك، وسى باعدارلاما ارقىلى ۇلتتىق بانك اكتسيونەرلەردىڭ جاۋاپكەرشىلىگىن قامتاماسىز ەتە وتىرىپ كاپيتالداندىرۋ ءۇشىن بانكتەرگە ۇزاق مەرزىمدى قارجىلاندىرۋ (تولەمدەر، مەرزىمدىلىك جانە وتەۋ قاعيدالارى بويىنشا) بەرەدى. ۇلتتىق بانك بۇل باعدارلامانىڭ باستالعانى تۋرالى شىلدە ايىندا حابارلاعان.

ۇلتتىق بانكتىڭ مالىمەتىنشە، بانكتەرگە قارجى ۇسىناتىن باعدارلاماعا كاپيتالى 45 ملرد تەڭگە شاماسىندا بولاتىن 15 قارجى ينستيتۋتى قاتىسا الادى. ياعني ۆلاديمير كيمنىڭ بانكتى 20 ملرد تەڭگەگە كاپيتالداندىرۋىنا قاراعاندا «Bank RBK» اق كاپيتالى 45 ملرد تەڭگەدەن تومەن بولۋى مۇمكىن. الايدا بانكتىڭ مالىمەتىنشە، 2017 جىلدىڭ 1 تامىزىنداعى ەسەپ بويىنشا قارجى ينستيتۋتىنىڭ جەكە كاپيتالى 96,6 ملرد تەڭگە، جارعىلىق كاپيتالى 64,4 ملرد تەڭگە بولعان. بۇدان Bank RBK-نىڭ ۇلتتىق بانك باعدارلاماسىنا قاتىسۋى نەگىزسىز ەكەنىن اڭعارۋعا بولادى.

تاعى ءبىر ەسكەرەتىن جايت، بانكتىڭ حابارلاۋىنشا، Standard & Poor's حالىقارالىق رەيتينگ اگەنتتىگى اتالعان بانكتىڭ كونتراگەنتتەرىنىڭ ۇزاق مەرزىمدى جانە قىسقا مەرزىمدى كرەديت رەيتينگىن «CCC + / C» دەڭگەيىنە، ۇلتتىق شكالا بويىنشا «kzB» دەڭگەيىنە دەيىن تومەندەتكەن. بانكتىڭ تۇسىندىرۋىنشە، رەيتينگتىڭ تومەندەۋى بانكتىڭ بيزنەس قۇرىلىمىنداعى وزگەرىسپەن جانە بانكتىڭ  «Qazaq Banki» اق-مەن بىرىگۋىمەن بايلانىستى.

ايتا كەتەيىك، مامىر ايىندا قازاقستانداعى «Bank RBK» اق مەن «Qazaq Banki» اق اكتسيونەرلەرى قارجى ينستيتۋتتارىن بىرىكتىرۋ تۋرالى كەلىسسوز جۇرگىزىپ جاتقانى حابارلانعان بولاتىن.

“The Qazaq Times”