قازاقستان قۇنارلى جەرلەر مەن بالقاش كولىنەن ايىرىلىپ قالۋى مۇمكىن

قازاقستان قۇنارلى جەرلەر مەن بالقاش كولىنەن ايىرىلىپ قالۋى مۇمكىن. كليماتولوگتاردىڭ سوزىنشە، الداعى بىرنەشە ونجىلدىقتا قازاقستاننىڭ كوپ بولىگى سۋسىز ايماققا اينالادى. بۇل تۋرالى كتك ارناسى حابارلاپ وتىر. 

"كليماتتا قۇرعاقشىلىق پايدا بولادى. اسىرەسە بۇل ەگىندىك القاپتار مەن قۇنارلى جەرلەر بولادى", - دەيدى "قازگيدرومەت" رمك عىلىمي-زەرتتەۋ ورتالىعىنىڭ ديرەكتورى پايىزحان قوجاحمەتوۆ. قاۋىپ ءتونىپ تۇرعان ايماقتار - قازاقستاننڭ سولتۇستىك، باتىس، ورتالىعى مەن بالقاش وزەنى.

"ەگەر مۇزدىقتار ەريتىن بولسا بالقاشتىڭ جويىلىپ كەتۋ قاۋىپى باسىم. ال ەگەر بۇل جاعداي جالعاسا بەرەتىن بولسا بالقاش ارالدىڭ كۇيىن كەشۋى عاجاپ ەمەس", - دەيدى قوجاحمەتوۆ.

ال ا.ي. ۆوەيكوۆ اتىنداعى گەوفيزيكالىق وبسەرۆاتورياسىنىڭ قىزمەتكەرى اندرەي كيسيلەۆتىڭ سوزىنشە، سوڭعى ون جىلدا اۋا رايىندا وزگەرىستەر بولىپ جاتىر. مىسالى نوسەر جاڭبىر كوبەيگەن. رەسەيدەگى گيدرومەت عىلىمي-زەرتتەۋ ورتالىعى ديرەكتورىنىڭ ورىنباسارى دميتري كيكتەۆ بولسا مۇنداي نوسەر جاڭبىر ورتالىق ازيا مەن قازاقستانعا اسا قاۋىپ توندىرمەيدى دەپ وتىر.

"ورتالىق ازياعا كەلەر بولساق، بۇل ايماقتاردا سۋ ماسەلەسى ونسىز دا قيىن. بىراق الداعى ون جىلدا بۇل جاعداي وڭاي بولادى دەپ ويلامايمىن. كوپتەگەن وڭىرلەر قۇرعاق، سوندىقتان بۇل ماسەلە ۋشىعا بەرەدى", - دەدى دميتري كيكتەۆ.

ايتا كەتەيىك، 2001 جىلدان بەرى ورتالىق ازيادا جاۋىن شاشىن مولشەرى 60%-عا تومەندەگەن، ال وزەندەردىڭ دەڭگەيى 3 ەسەگە ازايعان. سالدارىنان اۋدانداردا كەدەيلىك دەڭگەيى ارتىپ، كەيبىر اۋىل شارۋالارى تابىستارىنىڭ 80%-ىن جوعالتقان.

 “The Qazaq Times”