الماتىدا قۋعىن-سۇرگىن قۇرباندارىنا ارنالعان جاڭا ەسكەرتكىش اشىلادى

31 مامىر –  ساياسي قۋعىن-سۇرگىن قۇرباندارىن ەسكە الۋ كۇنى. بۇل كۇن قازاقستان رەسپۋبليكاسىنىڭ پرەزيدەنتى ن.نازارباەۆتىڭ جارلىعىمەن 1997 جىلدان باستاپ اتاپ ءوتىلىپ كەلەدى.  

حالقىمىزدىڭ باسىنا اۋىر زۇلمات اكەلگەن بۇل قارالى الاپات بىزدىڭ جادىمىزدان ماڭگى وشپەيدى. ءبىر ۇلتتى قۇرتىپ-جويىپ جىبەرۋگە ارنالعان اياۋسىز ساياساتتىڭ قۇرباندارى ءالى تولىق انىقتالعان جوق جانە تاريحي ادىلەتتىلككە قول جتەكىزگەن جوق دەۋگە بولادى.

بۇل تاريحي قاسىرەت 1925 جىلى قىركۇيەكتە قازاقستانعا باسشىلىق قىزمەتكە ف.گولوششەكيننىڭ كەلۋىنەن باستالدى.  ول قازاقستاندى كەڭەستىك وزگەرىستەردەن تىس قالعان دەپ ساناپ، وندا «كىشى قازان» توڭكەرىسىن جۇرگىزۋ ساياساتىن ۇستاندى. ونىڭ جۇرگىزگەن ساياساتى ۇلت زيالىلارىن جاپپاي قۋعىنداۋعا ۇلاستى.

«حالىق جاۋلارىن» قۋعىنداعان قاتال ساياساتتىڭ كەسىرىنەن جازىقسىز زارداپ شەككەندەردىڭ وزدەرى عانا ەمەس، جاقىندارى  مەن تۋىس-تۋعاندارى دا زارداپ شەكتى.

سونىمەن قاتار بۇل كۇن اشارشىلىقتان قىرىلعانداردى ەسە الۋ  كۇنى رەتىندە اتالىپ وتىلەدى. 1920 جىلداردىڭ سوڭىندا جانە 1932-1933 جىلدار ارالىعىندا قاساقانا ۇيىمداستىرىلعان جاساندى اشتىقتان، حالقىمىز اسا زور كولەمدە قىرعىن تاپقان بولاتىن. وسىعان وراي، 2012 جىلى ەلوردادا «1932-1933 جىلدارداعى اشارشىلىق قۇرباندارىنىڭ رۋحىنا تاعزىم» مونۋمەنتالدى ساۋلەتتى كوركەم كومپوزيتسياسى اشىلدى.

قازاقستان تاۋەلسىزدىگىن العاننان بەرى وسىنداي تاريحي اقتاڭداقتاردىڭ ورنىن تولتىرۋعا كۇش سالىپ كەلەدى. اسىرەسە، قوعامدىق ۇيىمدار مەن جەكەلەگەن ازاماتتار دا بۇل تۇرعىدا ەلەۋلى ەڭبەك ەتۋدە. سوڭعى جىلدارى بيلىك تە وسى ماسەلەگە بايلانىستى وڭ قادامدارعا بارا باستادى. سونىڭ ءبىر دالەلى رەتىندە ەرتەڭ الماتى قالاسىندا، قابانباي مەن ناۋىرزباي كوشەلەرىنىڭ قيىلىسىنداعى ساياباقتا قۋعىن-سۇرگىن قۇرباندارىنا ارناپ ورناتىلعان ەسكەرتكىشتىڭ اشىلۋى بولماق. وعان قالا باسشىسى ب.بايبەك قاتىسادى دەپ كۇتىلۋدە.

qazaqtimes.com