الماتىلىقتار اشارشىلىق قۇرباندارىنا تاعزىم ەتتى

بۇگىن الماتىدا 1931-1933 جىلدارعى اشارشىلىق قۇرباندارىنىڭ ەسكەرتكىشىنە گۇل شوقتارى قويىلدى. اتالعان شاراعا قوعام قايراتكەرلەرى، رەپرەسسيا مەن اشارشىلىق قۇرباندارىنىڭ ۇرپاقتارى، ۇكىمەتتىك ەمەس ۇيىمداردىڭ وكىلدەرى جانە قالا جاستارى قاتىستى.

الماتى اكىمى باۋىرجان بايبەك بىلتىر مەملەكەت باسشىسىنىڭ تاپسىرماسىمەن قالا ورتالىعىندا اشارشىلىق قۇرباندارىنا ەسكەرتكىش ورناتىلعانىن ايتىپ، ەرەكشە مۇسىندە - قولىنا ارىپ-اشقان، ءولىمشى حالدەگى بالاسىن ۇستاعان انا بەينەسىندەگى قازاق حالقىنىڭ اۋىر تاعدىرى بەينەلەنگەنىن اتاپ ءوتتى.

فوتو: الماتى قالاسى اكىمدىگىنىڭ ءباسپاسوز قىزمەتى

«تاريحتىڭ شەرلى ءۇنىن جەتكىزگەن بۇل ەسكەرتكىش – قالامىزدىڭ كيەلى نىساندار تىزىمىنە ەندى. بۇل – ەلباسى اتاپ وتكەندەي، «اشارشىلىقتا قۇربان بولعان ميلليونداردىڭ رۋحىنا بۇگىنگى بۋىننان تاعزىم جانە كەلەر ۇرپاق اتا-بابالارىنىڭ قانداي قاسىرەتتەردى باستان وتكەرگەنىن ءبىلىپ جۇرۋىنە قاجەت تاعىلىم»، - دەدى باۋىرجان بايبەك.

ول سول ءبىر قاسىرەتتى جىلدارى قازاق حالقىنىڭ ءوز ەڭسەسىن تىك كوتەرىپ قانا قويماي، قازاق  توپىراعىنا جەر اۋدارىلعان وزگە ۇلت وكىلدەرىن باۋىرىنا تارتىپ، قامقورلىعىنا العانىن  اتاپ ءوتتى.

فوتو: الماتى قالاسى اكىمدىگىنىڭ ءباسپاسوز قىزمەتى

ەسكە سالساق، بىلتىر «قاراعايلى» ساياباعىندا 1931-1933 جىلدارداعى اشارشىلىق قۇرباندارىنا ەسكەرتكىش  ورناتىلعان بولاتىن. بيىكتىگى  ءۇش مەترلىك قولا مەن گرانيتتەن قۇيىلعان مۇسىندە اشتىقتان ءولىمشى بولعان  بالاسىن كەۋدەسىنە باسقان انا بەينەلەنگەن.

قازاقستاندا 1918 جىلدان 1933 جىلدار ىشىندە ءتۇرلى مالىمەتتەر بويىنشا 3 ميلليوننان استام ادام جاپپاي قىرىلعان. ونىڭ جارتىسىنان استامى 1931-1933 جىلدارداعى اقجەم اشارشىلىق كەزىندە شەيىت بولعاندار. ال 1937-1938 جىلدارى 100 مىڭنان استام قازاقستاندىق كوز جۇمدى.

“The Qazaq Times”