كيم جوڭ ۋن كحدر حالىقتىڭ اسسامبلەياسىندا. فوتو: Toronto.star

كحدر جوعارى حالىقتىق اسسامبلەياسىنىڭ سىرتقى ىستەر كوميتەتى نارازىلىق حاتىن جاريا ەتتى. حاتتا اقش وكىلدەر پالاتاسىنىڭ سولتۇستىك كورەياعا باعىتتاعان جاڭا سانكتسياسىن ايىپتادى. بۇل اتالعان سانكتسيا كحدر-نىڭ شەتەل ازاماتتارىن سوتتاۋ، قاماۋعا الۋ ارەكەتتەرىنە قاراتىلعان بولاتىن. رەسمي پيوڭياڭ (پحەنيان) اقش-تىڭ بۇل ارەكەتى كوپە-كورنەۋ دەربەس ءبىر ەلدىڭ ىشكى ساياساتىنا ارالاسقاندىق دەپ ايىپتادى. بۇل تۋرالى قىتايدىڭ «شينحۋا» اگەنتتىگى سولتۇستىك كورەيانىڭ «ورتالىق اقپارات» اگەنتتىگىنە سىلتەمە جاساپ حابارلاپ وتىر.

كحدر جوعارعى حالىقتىق اسسامبلەياسى سىرتقى ىستەر كوميتەتى اقش-تىڭ وتكەن اپتادا جاريالاعان سانكتسياسىنا كۇشتى نارازىلىعىن ءبىلدىرىپ وتىر. اتالعان كوميتەت اقش-تىڭ بۇل قارارى سولتۇستىك كورەيانىڭ ەگەمەندىگى مەن حالقىنىڭ قۇقىعىنا قول سۇعۋ دەپ ايىپتادى. نارازىلىق حاتىندا: « اقش-تىڭ بۇل ارەكەتى ءار-قايسى ەلدىڭ تەڭدىگى مەن ەگەمەندىگىن ساقتاۋ جانە حالىقارالىق قۇقىقتىڭ باسقا دا پرينتسيپتەرىن ورەسكەل بۇزۋ بولىپ سانالادى. ءتىپتى «بۇۇ قارارىندا» اقش ءوزى باستاپ بۇزىپ وتىر»، – دەلىنگەن.

اشىق حاتتا امەريكا قۇراما شتاتى كورەي تۇبەگىنىڭ بەيبىتشىلىگى مەن تۇراقتىلىعىن بۇلدىرەتىن ارەكەتتەرگە ماقساتتى تۇردە بارىپ وتىر دەگەن ايىپتاۋلار دا بار. وعان قوسا اتالعان نارازىلىق حاتىندا بۇل ارەكەتتەرىنىڭ سولتۇستىك كورەيا يادرولىق ماسەلەسىن شەشۋگە كومەكتەسپەيتىندىگىن قاداي ايتقان. «بۇل اقش-تىڭ ءوز زاڭىن نەگىز ەتىپ، وزگەلەردىڭ ىشكى ساياساتىنا ارالاسۋ ءىسى دەپ ەسەپتەيمىز. اقش ۇكىمەتىنىڭ وزگەلەرگە قىسىم كورسەتەتىندىگىنىڭ ناقتى مىسالى»، – دەلىنگەن حاتتا.

ايىپتامادا بۇدان باسقا: «امەريكا شىنىمەن دە تۇبەكتە بەيبىتشىلىك ورناتقىسى كەلسە، نەمەسە سولتۇستىك كورەيا يادرولىق ماسەلەسىن شەشەمىن دەيدى ەكەن، وندا – تۇبەكتە تۇراقتى بەيبىتشىلىك رەجيمىن ورناتىپ، كحدر-اقش قارىم-قاتىناسىنىڭ ەرەجەسىن جاساۋى ءتيىس»، – دەگەن سوزدەر دە بار. بۇل مازمۇنعا قاراعاندا، سولتۇستىك كورەيا وزىنە دەگەن الەم ەلدەرىنىڭ قىسىمىنىڭ اۋىرلاپ كەتپەۋىنەن الاڭدايتىن كورۋگە بولادى. دەمەك، قاتاڭ نارازىلىق تاساسىندا اقش-پەن بىتىمگە كەلۋ نيەتىنىڭ دە بار ەكەنى دە بايقالىپ تۇر.

"The Qazaq Times"