قاۋىپتى ەسكەرتۋ: كورەي تۇبەگىندە شيەلەنىس ۋشىقتى

سولتۇستىك كورەيا كەشە وڭتۇستىك كورشىسىنە قاتاڭ ەسكەرتۋ جولدادى. ەل ليدەرىنىڭ قارىنداسى كيم يو جوڭ جاساعان مالىمدەمەدە وڭتۇستىك كورەيا قورعانىس ءمينيسترىنىڭ جاقىنداعى مالىمدەمەسىن ايىپتاپ، وزدەرىنە قارسى قانداي دا ءبىر قاۋىپتى ارەكەت سەۋلگە تيەسىلى قارۋلى كۇشتەردىڭ جويىلۋىنا الىپ كەلەتىنىن ەسكەرتكەن. 

وڭتۇستىك كورەيا قورعانىس ءمينيسترى  سيۋح ۆۋك وتكەن جۇما كۇنى جاساعان مالىمدەمەسىندە، وڭتۇستىك كورەيا ارمياسى قولىندا ءارتۇرلى قاشىقتىققا جەتەتىن جانە دالدىگى مەن قۋاتى جوعارى زىمىرانداردىڭ ۇلكەن سانىنا يە ەكەنىن، "سولتۇستىك كورەيانىڭ بارلىق نىساندارىنا جوعارى دالدىكپەن جانە اسا جىلدامدىقپەن سوققى بەرۋگە قابىلەتتى" ەكەندىكتەرىن ايتقان بولاتىن.

وڭتۇستىك كورەيالىق جوعارى اسكەري لاۋازىمدى زىمىران شابۋىلدارىنا قارسى وڭتۇستىك كورەيا قورعانىس كۇشتەرىنىڭ جوعارى دايىندىققا يە ەكەنىن باسا ايتادى. ول وزدەرىنە قارسى زىمىران شابۋىلدارىنىڭ كەز-كەلگەن بەلگىسى بايقالعان جاعدايدا وڭتۇستىك كورەيا قورعانىس كۇشتەرى قاۋىپتى نىساندى تەز ارادا جويىپ جىبەرە الاتىنىن سەنىمدى ەكەنىن جەتكىزەدى. ول جانە بۇل داۋلى مالىمدەمەسىندە سولتۇستىك كورەيانى "جاۋ" دەگەن سوزبەن سيپاتتايدى.

كيم حانىمنىڭ KCNA رەسمي اقپارات قۇرالىنا جاريالانعان مالىمدەمەسىندە،  وڭتۇستىك كورەيا قورعانىس ءمينيسترىنىڭ بۇل ريتوريكاسى وڭتۇستىك-سولتۇستىك قاتىناسىن جانە كورەي تۇبەگىنىڭ اسكەري شيەلەنىسىن ودان ارى ۋشىقتىرۋ دەپ باعالايدى. دەگەنمەن، ول وڭتۇستىك كورەيالىق جوعارى لاۋازىمدىنىڭ ءسوزىن بايىپپەن قارايتىنى، بىراق ونىڭ كەيبىر ماسەلەلەر بويىنشا قايتا باعالاۋى كەرەك ەكەنىن ايتادى. ءارى، ونىڭ بۇل مالىمدەمەسى وڭتۇستىك كورەياعا ەلەۋلى قاۋىپتەردى جاراتاتىنىن ەسكەرتىپ كەتكەن.

كيم يو جوڭمەن قاتار كحدر بيلەۋشى پارتياسى وك حاتشىسى پاك جوڭ چوڭ دا مالىمدەمە جاساپ: "وڭتۇستىك كورەيا اسكەريلەرى سولتۇستىككە قارسى كەز-كەلگەن قاتە شەشىممەن قاۋىپتى وپەراتسيا جاساۋدى نەمەسە الدىن الا سوققى بەرۋ سەكىلدى وتە قاۋىپتى اسكەري ارەكەت جاسايتىن بولسا، ءبىزدىڭ ارميا سەۋل مەن وڭتۇستىك كورەيا ارمياسىنىڭ نەگىزگى نىساندارىن تولىعىمەن جويۋ ءۇشىن قۋاتتى اسكەري سوققى  جاساۋدان تارتىنبايدى", – دەگەن.

سولتۇستىك كورەيا 26 اقپان مەن 4 ناۋرىز اراسىندا ەكى ءبىردي بالليستيكالىق زىمىران سىناعىن وتكىزگەننەن كەيىن كورەي تۇبەگىندەگى قايشىلىق قاتتى ۋشىعىپ كەتتى. ال، جاقىنداعى ICBM جۇيەسىن سىناۋى كحدر-نىڭ 2017 جىلدان بەرگى ەڭ اۋقىمدى زىمىران سىناعى سانالادى. الداعى ايدا وڭتۇستىك كورەيانىڭ جاڭا بيلىگى رەسمي تۇردە كەلۋ قارساڭىندا كورەي تۇبەگىندەگى جاعداي ءتىپتى دە ۋشىعىپ كەتۋى مۇمكىن دەگەن بولجامدار بار.

The Qazaq Times