سوعىس كۇيىندەگى كورەي تۇبەگى: سولتۇستىك وڭتۇستىككە جاۋاپ بەردى

سولتۇستىك كورەيا بيلىگى وڭتۇستىك كورەيانىڭ سوعىستىڭ اياقتالعانىن رەسمي تۇردە جاريالاپ، بەيبىت كەلىسىمگە كەلۋ تۋرالى شاقىرۋىنا جاۋاپ بەردى. ەلدىڭ ەڭ جوعارى ليدەرى كيم جوڭ ۋننىڭ (كيم چەن ىن) قارىنداسى كيم يو جوڭ (كيم يو چجون) جاۋابىندا وڭتۇستىك كورەيا «دۇشپاندىق» ساياساتىن توقتاتسا سويلەسۋلەردى قايتا باستاۋعا دايىن ەكەنىن ايتقان.

كورەي تۇبەگىندەگى سوعىس 1953 جىلى توقتاعان، بىراق ءبىرجولا بەيبىتشىلىك كەلىسىم ەمەس، ەلدەسۋ تالابىمەن توقتاعان بولاتىن. سودان بەرى كورەي تۇبەگى سوعىس كۇيىندە تۇردى. اراسىندا شيەلەنىستەر، قارۋلى قۇقاي كورسەتۋ دە، كەلىسسوز بەن ءوزارا جوعارى دەڭگەيدەگى الماسۋلار دا بولىپ تۇرعان.

وتكەن اپتادا وڭتۇستىك كورەيا پرەزيدەنتى ءمۇن جاين كورەي تۇبەگىندە بەيبىتشىلىك ورناتۋ ءۇشىن سولتۇستىك كورشىسىن مەن ونىڭ باستى قولداۋشىسى سانالاتىن قىتايدى جانە ءوزىنىڭ وداقتاسى اقش-تى كەلىسىمگە شاقىرعان بولاتىن.

وڭتۇستىك كورەيا اقپارات قۇرالدارىنىڭ جازۋىنشا، وڭتۇستىكتىڭ بەيبىتشىلىككە شاقىرۋىن باستاپتا سولتۇستىك كورەيانىڭ جوعارى جەتەكشىلەرى «تىم ەرتە» دەپ تويتارماق بولعان، كەيىننەن ەلدەگى بيلىك اۋلەتىنىڭ وكىلى كيم يو جوڭ «قىزىعارلىق» جاڭالىق دەپ قابىلداعان. بىراق، ول «وڭتۇستىك دۇشپاندىق ساياساتىن توقتاتقاندا عانا، سولتۇستىكتىڭ ۇسىنىستى تالقىلاۋعا دايار» دەپ ەسكەرتكەن.

«ءبىز ەكىجۇزدى مامىلەلەردى، لوگيكاعا سىيمايتىن كوزقاراستاردى، جامان ادەتتەردى جانە ءوز ارەكەتىمىزدى اقتاۋ ءۇشىن قاستىق مامىلەنى، سونداي-اق ءوزىمىزدى قورعاۋ قۇقىعىمىزدى بۇزۋدى تاستاۋىمىز كەرەك»، – دەگەن مالىمدەمەدە. سوعان قوسا: «بۇعان دەيىن قويىلعان شارتتار ورىندالعاندا عانا بەتپە-بەت وتىرىپ، سوعىستىڭ اياقتالعانىن جاريالاۋعا بولادى»، – دەگەن.

سوعىس كۇيىندەگى ەكى كورەيا ءبىر-ءبىرىن اسكەري ارەكەتتەرىمەن ءجيى سىناپ كەلەدى. قىركۇيەكتىڭ باس شەنىندە سولتۇستىك كورەيا قاناتتى زىمىران سىناعىن وتكىزدى، وعان جاۋاپ رەتىندە وڭتۇستىك كورەيا سۇڭگۋىر كەمەدەن اتىلاتىن بالليستيكالىق زىمىرانىن ءساتتى سىنادى. ەكى ەل دە ءبىر ءبىرىنىڭ اسكەري جاتتىعۋلارىن، زىمىران سىناقتارىن ايىپتايدى.

بەبىت كەلىسىم ءۇشىن وڭتۇستىك سولتۇستىكتىڭ يادرولىق قارۋىن جويۋىن تالاپ ەتىپ كەلسە، سولتۇستىك كۇيرەتۋشى ەكونوميكالىق سانكتسيالاردى الىپ تاستاۋدى تالاپ ەتىپ كەلەدى.

The Qazaq Times