Soltüstik Koreyanıñ AQŞ-pen kelisim jasasuğa nietti ekeni belgili boldı

KHDR Joğarı halıqtıq Assambleyasınıñ Sırtqı ister komiteti narazılıq hatın jariya etti. Hatta AQŞ Ökilder palatasınıñ Soltüstik Koreyağa bağıttağan jaña sankciyasın ayıptadı. Bwl atalğan sankciya KHDR-nıñ şetel azamattarın sottau, qamauğa alu äreketterine qaratılğan bolatın. Resmi Pioñyañ (Phen'yan) AQŞ-tıñ bwl äreketi köpe-körneu derbes bir eldiñ işki sayasatına aralasqandıq dep ayıptadı. Bwl turalı Qıtaydıñ «Şinhua» agenttigi Soltüstik Koreyanıñ «Ortalıq Aqparat» agenttigine silteme jasap habarlap otır.

KHDR Joğarğı halıqtıq Assambleyası Sırtqı ister komiteti AQŞ-tıñ ötken aptada jariyalağan sankciyasına küşti narazılığın bildirip otır. Atalğan komitet AQŞ-tıñ bwl qararı Soltüstik Koreyanıñ egemendigi men halqınıñ qwqığına qol swğu dep ayıptadı. Narazılıq hatında: « AQŞ-tıñ bwl äreketi är-qaysı eldiñ teñdigi men egemendigin saqtau jäne halıqaralıq qwqıqtıñ basqa da principterin öreskel bwzu bolıp sanaladı. Tipti «BWW qararında» AQŞ özi bastap bwzıp otır», – delingen.

Aşıq hatta Amerika Qwrama Ştatı Korey tübeginiñ beybitşiligi men twraqtılığın büldiretin äreketterge maqsattı türde barıp otır degen ayıptaular da bar. Oğan qosa atalğan narazılıq hatında bwl äreketteriniñ Soltüstik Koreya yadrolıq mäselesin şeşuge kömektespeytindigin qaday aytqan. «Bwl AQŞ-tıñ öz zañın negiz etip, özgelerdiñ işki sayasatına aralasu isi dep esepteymiz. AQŞ ükimetiniñ özgelerge qısım körsetetindiginiñ naqtı mısalı», – delingen hatta.

Ayıptamada bwdan basqa: «Amerika şınımen de tübekte beybitşilik ornatqısı kelse, nemese Soltüstik Koreya yadrolıq mäselesin şeşemin deydi eken, onda – tübekte twraqtı beybitşilik rejimin ornatıp, KHDR-AQŞ qarım-qatınasınıñ erejesin jasauı tiis», – degen sözder de bar. Bwl mazmwnğa qarağanda, Soltüstik Koreya özine degen älem elderiniñ qısımınıñ auırlap ketpeuinen alañdaytın köruge boladı. Demek, qatañ narazılıq tasasında AQŞ-pen bitimge kelu nietiniñ de bar ekeni de bayqalıp twr.

"The Qazaq Times"