"Ana jüregindegi ömir" men "Şeksizdik üni". Foto By Altınay Mwrat

Keşe, 9 säuirde, Almatı qalası Ortalıqtandırğan kitaphana jüyesiniñ №44 kitaphanasında eki jas aqınnıñ jır jinaqtarı twsauı kesilip, oqırmandarına jol tarttı.

Ädebi şarada Retbek Mağaz ben Erkejan Beysenbekqızı qatarlı aqındardıñ "Şeksizdik üni" jäne "Ana jüregindegi ömir" attı eñbekteri oqırmandarğa tanıstırıldı. Atalğan jır jinaqtarınıñ twsauın bügingi qazaq poeziyasınıñ asa körnekti ökili Mwrat Şaymaran men aqın Bolat Qwrmanğajıwlı kesip, oqırman örisindegi jolına sättilik tiledi.

Aqın Mwrat Şaymaran men Bolat Qwrmanğajı jaña kitaptardıñ twsauın kesti. Foto: By Altınay Mwrat

Twsaukeserden keyin aqın Bolat Qwrmanğajı Erkejan Beysenbekqızınıñ şığarmalarına ädebi twrğıda taldau jasağan bayandamasın oqısa, aqın Mwrat Şaymaran qos aqınnıñ şığarmalarınıñ negizgi erekşeligin ayta kelip, qazaq poeziyasına Retbek Mağaz ben Erkejan Beysenbekqızı sındı talanttardıñ kelip qosılğanına ayrıqşa quanışın jetkizdi.

Jır keşiniñ mazmwnın dästürli änşi Ermek Rahmbaydıñ orındauında aqın Retbek Mağazdıñ äni men sözine jazılğan "Añsatım-ay" änin tipti de bayıta tüsti. Poeziya keşinde Qoyşıbek Mübarak, Wlan Bapay, Irısbek Däbey, Twrdıhan Aydarhan qatarlı ädebiet ökilderi Retbek Mağaz ben Erkejan Beysenbek sındı jas aqındardıñ şığarmaşılıq erekşelikteri, jalpı qazaq poeziyasınıñ qazirgi jañalığı turalı öz pikirlerin ortağa saldı.

Qazaq poeziyasına jaña jır jinaqtarın tartu etken qos aqın bwğan deyin de poeziya süygiş oqırmandarğa tanıs bolıp ülgirgen edi. Aqın Erkejan Beysenbekqızı "Teñizge ğaşıq bwlaqtar" attı Qıtaydağı birqatar jas aqındardıñ jır almanağı arqılı Atajwrttağı ädebiet qauımına atı tanıs bolğan. Al, Retbek Mağaz bolsa, student şağında "Ğayıptan tamğan tamşı" attı jır jinağımen poeziya köşine ilesken. Retbek Mağaz qazir äl-Farabi atındağı QazWU-da oqıtuşı bolıp jwmıs isteydi.

Şara soñğındağı arnayı qonaqasığa jalğasıp, qazaq poeziyasınıñ "jas börileri" öleñderimen örnektelip, än-küymen ärlendi.

Mwrat Altınay 

The Qazaq Times