Sözinen aynığan Toqaev qazaqstandıq vakcinanı da saldıruğa nietti

Qazaqstan prezidenti Qasım-Jomart Toqaevtıñ baspasöz hatşısı Berik Uäli onıñ "qazaqstandıq ekpe saldıramın" degen sözinen nege aynıp ketkenin tüsindirdi. Bwl jaylı ol bügin Facebook paraqşasında jazdı.

Uälidiñ jazuınşa, 6 säuirde reseylik "Sputnik V" vakcinasın saldırğan Toqaev aldağı uaqıtta qazaqstandıq ğalımdar dayındap jatqan QazCovid-in ekpesin aluğa da nietti.

"Azamattarımız äleumettik jelilerde memleket basşısınıñ bwğan deyin qazaqstandıq vakcina saldıramın dep, biraq onı kütpey, "Sputnik V" ekpesin alğanı jöninde swraqtar qoyuda. Prezidenttiñ ärqaşan da otandıq önimdi qoldaytının senimdi türde ayta alamın. Qasım-Jomart Toqaev Qarağandıda şığarılğan vakcinanı saldırdı jäne bizdiñ ğalımdarğa tolıq senedi. Qazaqstandıq vakcina öndirisi iske qosılğannan keyin memleket basşısı Jambıl oblısına barıp, käsiporınnıñ jwmısımen arnayı tanısudı josparlap otır. Prezident kelesi jolı koronavirusqa qarsı otandıq ekpeni saldıruğa nietti" dep jazdı Berik Uäli.

Toqaev jıl basında, 25 qañtar küngi ükimettiñ keñeytilgen otırısında qazaqstandıq QazCovid-in vakcinası sınaqtan sätti ötse, "otandıq vakcinanı saldıramın" dep mälimdegen edi. Alayda 6 säuir küni onıñ «Sputnik V» vakcinasın salğızğanı belgili boldı.

Atauı QazCovid-in-nan QazVac-qa özgergen qazaqstandıq vakcina qazir sınaqtıñ üşinşi kezeñinen ötip jatır. Onı qazaqstandıq ğalımdar Jambıl oblısında dayındap jatır.

Şikizatı Reseyden jetkiziletin «Sputnik V» ekpesi Qarağandı farmacevtika keşeninde öndiriledi. Bwl kompaniyağa ielik etuşilerdiñ biri - Qazaqstandı 30 jılday bilegen Nwrswltan Nazarbaevtardıñ qwdası, belgili oligarh Qayrat Boranbaev. 15 mlrd teñge qarjı qarastırılğan öndiris ornı özin «biotehnologiyalıq preparattar öndirisine mamandandırılğan QR-dağı alğaşqı jäne äzirge jalğız farmacevtikalıq zauıt» dep sanaydı.

Qazaqstanda koronavirusqa qarsı vakcinaciya 1 aqpanda bastalğan. Eki ay degende halıqtıñ 1%-dan säl asa böligi, yağni 194 706 adam reseylik ekpeniñ alğaşqı dozasın saldırğan. Äzirge medicina qızmetkerleri, mwğalimder men küştik qwrılım ökilderine basımdıq berilip jatır.

"The Qazaq Times"