قازاقستان پرەزيدەنتى قاسىم-جومارت توقاەۆتىڭ ءباسپاسوز حاتشىسى بەرىك ءۋالي ونىڭ "قازاقستاندىق ەكپە سالدىرامىن" دەگەن سوزىنەن نەگە اينىپ كەتكەنىن ءتۇسىندىردى. بۇل جايلى ول بۇگىن Facebook پاراقشاسىندا جازدى.

ءۋاليدىڭ جازۋىنشا، 6 ساۋىردە رەسەيلىك "سپۋتنيك V" ۆاكتسيناسىن سالدىرعان توقاەۆ الداعى ۋاقىتتا قازاقستاندىق عالىمدار دايىنداپ جاتقان QazCovid-in ەكپەسىن الۋعا دا نيەتتى.

"ازاماتتارىمىز الەۋمەتتىك جەلىلەردە مەملەكەت باسشىسىنىڭ بۇعان دەيىن قازاقستاندىق ۆاكتسينا سالدىرامىن دەپ، بىراق ونى كۇتپەي، "سپۋتنيك V" ەكپەسىن العانى جونىندە سۇراقتار قويۋدا. پرەزيدەنتتىڭ ارقاشان دا وتاندىق ءونىمدى قولدايتىنىن سەنىمدى تۇردە ايتا الامىن. قاسىم-جومارت توقاەۆ قاراعاندىدا شىعارىلعان ۆاكتسينانى سالدىردى جانە ءبىزدىڭ عالىمدارعا تولىق سەنەدى. قازاقستاندىق ۆاكتسينا ءوندىرىسى ىسكە قوسىلعاننان كەيىن مەملەكەت باسشىسى جامبىل وبلىسىنا بارىپ، كاسىپورىننىڭ جۇمىسىمەن ارنايى تانىسۋدى جوسپارلاپ وتىر. پرەزيدەنت كەلەسى جولى كوروناۆيرۋسقا قارسى وتاندىق ەكپەنى سالدىرۋعا نيەتتى" دەپ جازدى بەرىك ءۋالي.

توقاەۆ جىل باسىندا، 25 قاڭتار كۇنگى ۇكىمەتتىڭ كەڭەيتىلگەن وتىرىسىندا قازاقستاندىق QazCovid-in ۆاكتسيناسى سىناقتان ءساتتى وتسە، "وتاندىق ۆاكتسينانى سالدىرامىن" دەپ مالىمدەگەن ەدى. الايدا 6 ءساۋىر كۇنى ونىڭ «سپۋتنيك V» ۆاكتسيناسىن سالعىزعانى بەلگىلى بولدى.

اتاۋى QazCovid-in-نان QazVac-قا وزگەرگەن قازاقستاندىق ۆاكتسينا قازىر سىناقتىڭ ءۇشىنشى كەزەڭىنەن ءوتىپ جاتىر. ونى قازاقستاندىق عالىمدار جامبىل وبلىسىندا دايىنداپ جاتىر.

شيكىزاتى رەسەيدەن جەتكىزىلەتىن «سپۋتنيك V» ەكپەسى قاراعاندى فارماتسەۆتيكا كەشەنىندە وندىرىلەدى. بۇل كومپانياعا يەلىك ەتۋشىلەردىڭ ءبىرى - قازاقستاندى 30 جىلداي بيلەگەن نۇرسۇلتان نازارباەۆتاردىڭ قۇداسى، بەلگىلى وليگارح قايرات بورانباەۆ. 15 ملرد تەڭگە قارجى قاراستىرىلعان ءوندىرىس ورنى ءوزىن «بيوتەحنولوگيالىق پرەپاراتتار وندىرىسىنە مامانداندىرىلعان قر-داعى العاشقى جانە ازىرگە جالعىز فارماتسەۆتيكالىق زاۋىت» دەپ سانايدى.

قازاقستاندا كوروناۆيرۋسقا قارسى ۆاكتسيناتسيا 1 اقپاندا باستالعان. ەكى اي دەگەندە حالىقتىڭ 1%-دان ءسال اسا بولىگى، ياعني 194 706 ادام رەسەيلىك ەكپەنىڭ العاشقى دوزاسىن سالدىرعان. ازىرگە مەديتسينا قىزمەتكەرلەرى، مۇعالىمدەر مەن كۇشتىك قۇرىلىم وكىلدەرىنە باسىمدىق بەرىلىپ جاتىر.

"The Qazaq Times"