Bügin, 2 jeltoqsan OKQ alañında ötken onlayn-brifingte The Qazaq Times redakciyasınıñ tilşisi qoyğan saualına Jambıl oblısınıñ äkimi Berdibek Saparbaev sertine beriktigin «qadap» ayttı.

«Birinşiden, Alaş mwrajayı jöninde men eşkimge uäde bergen joqpın. Odan keyin men uäde bersem orındaymın!»  – degen «dağdarıs menedjeri» öktem söyledi.

Biraq Saparbaev aqpandağı uädesin wmıtqan tärizdi.

Biıl 19 aqpanda äkim halıqqa esep bergen jiında «...bıltır Jambıl oblısınıñ 80 jıldığına oray aşılğan nısandardıñ qwrılısı da jalğasadı, «Tektwrmas» etno-tarihi keşeniniñ ekinşi kezeñi ayaqtaladı. Qazaq handığı eskertişiniñ aumağına mwrajay salınadı. Sonday-aq Alaştanu ortalığınıñ qwrılısı bastaladı», – dep süyinşilep uäde bergen.

Bwl turalı jergilikti jäne respublikalıq BAQ betterinde jariyalandı.

Miz baqpadı ma, älde wmıtıp ayttı ma, äyteuir «täjiribeli memleket qızmetşisi» özine senimdi söyledi.

Qorday oqiğasınan üş künnen, tağayındalğanınan toğız kün ötkennen keyin Berdibek Saparbaev halıqqa esep bergeni esimizde. Sonda Alaş  mwrajayın saluğa, mädeni ömirdi jandandıruğa söz bergen ol jobanı iske asırmaq tügili esine tüsire almadı. Soğan qarağanda özinen bwrınğı äkim Asqar Mırzahmettiñ dayın bayandaması negizinde oqığan tärizdi dep topşılaymız. Qazaq-düngen qaqtığısınan keyin «ört söndiruge» dereu kelgen äkimniñ bwl jayttı jan-dilimen sezilmegeni bayqaladı.

Bwl joba äkimniñ esinde bolmağanımen, oblıs äkimdiginiñ Mädeniet, arhivter jäne qwjattama basqarmasınıñ sol kezdegi basşısı Düysenäli Bıqıbaevtıñ aytuınşa, Alaş mwrajayı turalı eks-äkim Mırzahmettiñ twsında wsınılıp, qoldau tapqan. Tipti Alaşordanıñ 100 jıldığı mereytoyı kezinde jinaqtalğan tarihi-mädeni mwralar men eksponattar muzeyge qoyu maqsatında jıl basında basqarma bastığınıñ qwnttauımen qayta tolıqtırılğan. Qısqası, mwrajaydıñ jaymasöreleri men vitrinalarına qoyılatın jädigerler äzirlenip qoyılğan.

Tamız ayında zeynet jasına baylanıstı qızmetinen bosağan Bıqıbaev «Äu basta Kerey men Jänibek handardıñ eskertkişteriniñ artınan eki-üş nısan aşu josparda bolğan. Keyin 15 naurızdağı prezident Toqaev pen Ükimettiñ şeşimimen «Qarjını ünemdeu kerek» dep aytılğannan keyin biraz jobalar toqtadı. Sonıñ işinde mwrajaydıñ qwrılısı da kiredi. Biraq mwrajaydıñ barlıq maketteri men sızbaların dayarlap qoydıq. Biz tek zertteu materialdarın, tarihi qwjattardı äzirledik. Jalpı bizdiñ mindet işki jabdıqtarın rettestirip qoyu bolatın. «Ruhaniyat» ortalığı arhiv, muzey arqılı tarihi materialdardı äli de jinaqtaldı. Jobalıq smeta dayarlanğan joq», – dedi.  

Sonımen qosa, bwrınğı basqarma basşısı öñir äkimi Saparbaevtıñ mwrajay saluğa uäde bergenin rastadı. Qay jılğa ısırılğanı turalı swrağanımızda ol sözin «oblıs basşılarınıñ patşa köñili biledi» dep tüyindedi.

Osı küzde Berdibek Saparbaev eki birdey qımbat monumenttiñ lentasın qiğan. Aşıq derekközderdegi mälimetke sensek, Qazaqstannıñ eks-prezidenti N.Nazarbaevtıñ tapsırmasımen qwnı 158 mln teñge bolatın  «Qazaq halqına mıñ alğıs» monumenti men pandemiyanı eñsermey jatıp kölemi jağınan alğaşqısınan äldeqayda ülken «Biz Birgemiz» keşeni boy kötergen. Bilik sayasatı boyınşa birden boy kötergen qos estkerkiştiñ  byudjeti men qaydan qarjılandırılğanı belgisiz.

Pandemiya kezinde tur wyımdastıruğa (soñı dert jwqqan nauqastıñ ölimine jetken), qwnı jüzdegen million twratın  eki birdey alıp monumentke qarjı ünemdeudi oylamağan oblıs äkimdigi nelikten Alaş mwrajayınıñ qwrılısın «artıq şığınğa» balağanı tüsiniksiz.

Köptegen tarihşılar men köpşilik şeneunik- ziyalılardıñ Leninşil Kommunistik Jastar Odağınıñ 100 jıldıq  mereytoyın atoylatıp, al Alaşordanıñ 100 jıldığın  jetim qızdıñ toyınday eleusiz ötkizgenin köp sınağan.

"The Qazaq Times"