بۇگىن، 2 جەلتوقسان وكق الاڭىندا وتكەن ونلاين-بريفينگتە The Qazaq Times رەداكتسياسىنىڭ ءتىلشىسى قويعان ساۋالىنا جامبىل وبلىسىنىڭ اكىمى بەردىبەك ساپارباەۆ سەرتىنە بەرىكتىگىن «قاداپ» ايتتى.

«بىرىنشىدەن، الاش مۇراجايى جونىندە مەن ەشكىمگە ۋادە بەرگەن جوقپىن. ودان كەيىن مەن ۋادە بەرسەم ورىندايمىن!»  – دەگەن «داعدارىس مەنەدجەرى» وكتەم سويلەدى.

بىراق ساپارباەۆ اقپانداعى ۋادەسىن ۇمىتقان ءتارىزدى.

بيىل 19 اقپاندا اكىم حالىققا ەسەپ بەرگەن جيىندا «...بىلتىر جامبىل وبلىسىنىڭ 80 جىلدىعىنا وراي اشىلعان نىسانداردىڭ قۇرىلىسى دا جالعاسادى، «تەكتۇرماس» ەتنو-تاريحي كەشەنىنىڭ ەكىنشى كەزەڭى اياقتالادى. قازاق حاندىعى ەسكەرتىشىنىڭ اۋماعىنا مۇراجاي سالىنادى. سونداي-اق الاشتانۋ ورتالىعىنىڭ قۇرىلىسى باستالادى», – دەپ سۇيىنشىلەپ ۋادە بەرگەن.

بۇل تۋرالى جەرگىلىكتى جانە رەسپۋبليكالىق باق بەتتەرىندە جاريالاندى.

ءمىز باقپادى ما، الدە ۇمىتىپ ايتتى ما، ايتەۋىر «تاجىريبەلى مەملەكەت قىزمەتشىسى» وزىنە سەنىمدى سويلەدى.

قورداي وقيعاسىنان ءۇش كۇننەن، تاعايىندالعانىنان توعىز كۇن وتكەننەن كەيىن بەردىبەك ساپارباەۆ حالىققا ەسەپ بەرگەنى ەسىمىزدە. سوندا الاش  مۇراجايىن سالۋعا، مادەني ءومىردى جانداندىرۋعا ءسوز بەرگەن ول جوبانى ىسكە اسىرماق تۇگىلى ەسىنە تۇسىرە المادى. سوعان قاراعاندا وزىنەن بۇرىنعى اكىم اسقار مىرزاحمەتتىڭ دايىن بايانداماسى نەگىزىندە وقىعان ءتارىزدى دەپ توپشىلايمىز. قازاق-دۇنگەن قاقتىعىسىنان كەيىن «ءورت سوندىرۋگە» دەرەۋ كەلگەن اكىمنىڭ بۇل جايتتى جان-دىلىمەن سەزىلمەگەنى بايقالادى.

بۇل جوبا اكىمنىڭ ەسىندە بولماعانىمەن، وبلىس اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ سول كەزدەگى باسشىسى دۇيسەنالى بىقىباەۆتىڭ ايتۋىنشا، الاش مۇراجايى تۋرالى ەكس-اكىم مىرزاحمەتتىڭ تۇسىندا ۇسىنىلىپ، قولداۋ تاپقان. ءتىپتى الاشوردانىڭ 100 جىلدىعى مەرەيتويى كەزىندە جيناقتالعان تاريحي-مادەني مۇرالار مەن ەكسپوناتتار مۋزەيگە قويۋ ماقساتىندا جىل باسىندا باسقارما باستىعىنىڭ قۇنتتاۋىمەن قايتا تولىقتىرىلعان. قىسقاسى، مۇراجايدىڭ جايماسورەلەرى مەن ۆيترينالارىنا قويىلاتىن جادىگەرلەر ازىرلەنىپ قويىلعان.

تامىز ايىندا زەينەت جاسىنا بايلانىستى قىزمەتىنەن بوساعان بىقىباەۆ «ءاۋ باستا كەرەي مەن جانىبەك حانداردىڭ ەسكەرتكىشتەرىنىڭ ارتىنان ەكى-ءۇش نىسان اشۋ جوسپاردا بولعان. كەيىن 15 ناۋرىزداعى پرەزيدەنت توقاەۆ پەن ۇكىمەتتىڭ شەشىمىمەن «قارجىنى ۇنەمدەۋ كەرەك» دەپ ايتىلعاننان كەيىن ءبىراز جوبالار توقتادى. سونىڭ ىشىندە مۇراجايدىڭ قۇرىلىسى دا كىرەدى. بىراق مۇراجايدىڭ بارلىق ماكەتتەرى مەن سىزبالارىن دايارلاپ قويدىق. ءبىز تەك زەرتتەۋ ماتەريالدارىن، تاريحي قۇجاتتاردى ازىرلەدىك. جالپى ءبىزدىڭ مىندەت ىشكى جابدىقتارىن رەتتەستىرىپ قويۋ بولاتىن. «رۋحانيات» ورتالىعى ارحيۆ، مۋزەي ارقىلى تاريحي ماتەريالداردى ءالى دە جيناقتالدى. جوبالىق سمەتا دايارلانعان جوق»، – دەدى.  

سونىمەن قوسا، بۇرىنعى باسقارما باسشىسى ءوڭىر اكىمى ساپارباەۆتىڭ مۇراجاي سالۋعا ۋادە بەرگەنىن راستادى. قاي جىلعا ىسىرىلعانى تۋرالى سۇراعانىمىزدا ول ءسوزىن «وبلىس باسشىلارىنىڭ پاتشا كوڭىلى بىلەدى» دەپ تۇيىندەدى.

وسى كۇزدە بەردىبەك ساپارباەۆ ەكى بىردەي قىمبات مونۋمەنتتىڭ لەنتاسىن قيعان. اشىق دەرەككوزدەردەگى مالىمەتكە سەنسەك، قازاقستاننىڭ ەكس-پرەزيدەنتى ن.نازارباەۆتىڭ تاپسىرماسىمەن قۇنى 158 ملن تەڭگە بولاتىن  «قازاق حالقىنا مىڭ العىس» مونۋمەنتى مەن پاندەميانى ەڭسەرمەي جاتىپ كولەمى جاعىنان العاشقىسىنان الدەقايدا ۇلكەن «Biz Birgemiz» كەشەنى بوي كوتەرگەن. بيلىك ساياساتى بويىنشا بىردەن بوي كوتەرگەن قوس ەستكەركىشتىڭ  بيۋدجەتى مەن قايدان قارجىلاندىرىلعانى بەلگىسىز.

پاندەميا كەزىندە تۋر ۇيىمداستىرۋعا (سوڭى دەرت جۇققان ناۋقاستىڭ ولىمىنە جەتكەن), قۇنى جۇزدەگەن ميلليون تۇراتىن  ەكى بىردەي الىپ مونۋمەنتكە قارجى ۇنەمدەۋدى ويلاماعان وبلىس اكىمدىگى نەلىكتەن الاش مۇراجايىنىڭ قۇرىلىسىن «ارتىق شىعىنعا» بالاعانى تۇسىنىكسىز.

كوپتەگەن تاريحشىلار مەن كوپشىلىك شەنەۋنىك- زيالىلاردىڭ لەنينشىل كوممۋنيستىك جاستار وداعىنىڭ 100 جىلدىق  مەرەيتويىن اتويلاتىپ، ال الاشوردانىڭ 100 جىلدىعىن  جەتىم قىزدىڭ تويىنداي ەلەۋسىز وتكىزگەنىن كوپ سىناعان.

"The Qazaq Times"