Nauqastı qarap jatqan däriger. Körneki suret. Foto: RIA Novosti

Densaulıq saqtau ministrligi koronavirustıq pnevmoniya şaldıqqan ärbir pacientti emdeuge bölinetin täuliktik şığınnıñ kölemi  22-70 mıñ teñge aralığında ekenin habarladı.

«Pnevmoniya türlerine qaray, sonıñ işinde tamız ayınan bastap jañaşa eseptele bastağan koronavirustıq pnevmoniyanı emdeuge är pacient üşin qanşa qarjı bölinedi? Qalıptı pnevmoniya men koronavirustıq pnevmoniyağa şaldıqqan nauqastı kütu, däri-därmegi, emdeu proceduralarınıñ bärin qosqanda adam basına jağdayınıñ deñgeyine (jay, ortaşa, kürdeli, auır) qaray qarastırılıp, bekitilgen qarjınıñ teñgeley minimumnan maksimumğa deyingi körsetkişi qanşa?» degen QT saualına DenMin-niñ resmi ökili Bağdat Qojahmetov jauap berdi.

Onıñ sözinşe, ükimet stacionardağı medicinalıq qızmettiñ sapasın arttıru üşin «Äleumettik medicinalıq saqtandıru qorı» AWQ arqılı şilde ayında medicinalıq wyımdar üşin tarifterdi kötergen.

«Osığan säykes, atalğan qor arqılı provizorlıq stacionardağı ärbir tösek-orın üşin künine 21,9 mıñ teñge tölenedi. Täuliktik stacionarğa jatqızılğandar üşin 32,2 mıñ teñge. Anesteziologiya, reanimaciya jäne qarqındı terapiya böliminde jatqan nauqastı emdeu üşin künine 70 mıñ teñge qarastırılğan. Medicinalıq jäne medicinalıq emes wyımdar COVID-19 koronavirustıq pandemiyamen baylanıstı tötenşe jağday kezinde töleytin medicinalıq qızmetterge tarifter qalıptastıru ädistemesine säykes esepteledi jäne kelesi şığındardı qamtidı», – deydi Qojahmetov jauap hatında.

Şığındar qatarına eñbekaqı salıq, tamaqtandıru, medikamentter (onıñ işinde jeke qorğanu zattarı), qajetti tauar türleri, kommunaldıq qızmetter, baylanıs qızmeti t.b. jatadı eken. Biraq ministrlik bwl somanıñ jay pnevmoniya men koronavirustıq pnevmoniyanıñ qay türine qatıstı ekenin naqtılamağan.

Şilde ayında koronavirus jwqtırğan nauqastı emdeuge jwmsalatın aqşanıñ kölemi aytılğan edi. Tarifter sanatqa baylanıstı ärtürli bektilgen. Mäselen, şildeniñ basına deyin karantindegi är nauqasqa – 10,4 mıñ teñge, provizorlı bölimde – 11,6 mıñ teñge, infekciyalıq – 15,1 mıñ teñge bölinip kelgen. Sonımen qatar, virusqa qarsı preparattar auruhanalarda qoldanğannan keyin medicinalıq wyımdarğa bölek tölenedi.

Körşi Qırğızstanda jalpı emdeu kursına nauqastıñ jağdayına qaray 3-132 mıñ som aralığında qarjı jwmsaladı.

Qazaqstanda pandemiya bastalğalı bilik moyındağan 132 354 jağday (U07.1+U07.2) tirkeldi. İndettiñ kesirinen 1 907 adam (U07.1+U07.2) qaytıs boldı, onıñ 898-ı tek tamızğa tiesili. Alayda jalpı sanaqqa koronavirustıñ janama äserinen qaytıs bolğan jüzdegen adam engizilmegen. Resmi statistika boyınşa, bügingi tañda koronavirus anıqtalğan 106 mıñ adamnıñ 98 mıñğa juığı sauığıp şıqqan. Al koronavirustıq pnevmoniyağa şaldıqqandardıñ tek besten bir böligi ğana auruınan ayıqqan. YAğni 26 mıñnan astam nauqastıñ emdelgeni 6 mıñday ğana.

"The Qazaq Times"