دەنساۋلىق ساقتاۋ مينيسترلىگى كوروناۆيرۋستىق پنەۆمونيا شالدىققان ءاربىر پاتسيەنتتى ەمدەۋگە بولىنەتىن تاۋلىكتىك شىعىننىڭ كولەمى 22-70 مىڭ تەڭگە ارالىعىندا ەكەنىن حابارلادى.
«پنەۆمونيا تۇرلەرىنە قاراي، سونىڭ ىشىندە تامىز ايىنان باستاپ جاڭاشا ەسەپتەلە باستاعان كوروناۆيرۋستىق پنەۆمونيانى ەمدەۋگە ءار پاتسيەنت ءۇشىن قانشا قارجى بولىنەدى؟ قالىپتى پنەۆمونيا مەن كوروناۆيرۋستىق پنەۆمونياعا شالدىققان ناۋقاستى كۇتۋ، ءدارى-دارمەگى، ەمدەۋ پروتسەدۋرالارىنىڭ ءبارىن قوسقاندا ادام باسىنا جاعدايىنىڭ دەڭگەيىنە (جاي، ورتاشا، كۇردەلى، اۋىر) قاراي قاراستىرىلىپ، بەكىتىلگەن قارجىنىڭ تەڭگەلەي مينيمۋمنان ماكسيمۋمعا دەيىنگى كورسەتكىشى قانشا؟» دەگەن QT ساۋالىنا دەنمين-ءنىڭ رەسمي وكىلى باعدات قوجاحمەتوۆ جاۋاپ بەردى.
ونىڭ سوزىنشە، ۇكىمەت ستاتسيونارداعى مەديتسينالىق قىزمەتتىڭ ساپاسىن ارتتىرۋ ءۇشىن «الەۋمەتتىك مەديتسينالىق ساقتاندىرۋ قورى» اۇق ارقىلى شىلدە ايىندا مەديتسينالىق ۇيىمدار ءۇشىن تاريفتەردى كوتەرگەن.
«وسىعان سايكەس، اتالعان قور ارقىلى پروۆيزورلىق ستاتسيونارداعى ءاربىر توسەك-ورىن ءۇشىن كۇنىنە 21,9 مىڭ تەڭگە تولەنەدى. تاۋلىكتىك ستاتسيونارعا جاتقىزىلعاندار ءۇشىن 32,2 مىڭ تەڭگە. انەستەزيولوگيا، رەانيماتسيا جانە قارقىندى تەراپيا بولىمىندە جاتقان ناۋقاستى ەمدەۋ ءۇشىن كۇنىنە 70 مىڭ تەڭگە قاراستىرىلعان. مەديتسينالىق جانە مەديتسينالىق ەمەس ۇيىمدار COVID-19 كوروناۆيرۋستىق پاندەميامەن بايلانىستى توتەنشە جاعداي كەزىندە تولەيتىن مەديتسينالىق قىزمەتتەرگە تاريفتەر قالىپتاستىرۋ ادىستەمەسىنە سايكەس ەسەپتەلەدى جانە كەلەسى شىعىنداردى قامتيدى»، – دەيدى قوجاحمەتوۆ جاۋاپ حاتىندا.
شىعىندار قاتارىنا ەڭبەكاقى سالىق، تاماقتاندىرۋ، مەديكامەنتتەر (ونىڭ ىشىندە جەكە قورعانۋ زاتتارى), قاجەتتى تاۋار تۇرلەرى، كوممۋنالدىق قىزمەتتەر، بايلانىس قىزمەتى ت.ب. جاتادى ەكەن. بىراق مينيسترلىك بۇل سومانىڭ جاي پنەۆمونيا مەن كوروناۆيرۋستىق پنەۆمونيانىڭ قاي تۇرىنە قاتىستى ەكەنىن ناقتىلاماعان.
شىلدە ايىندا كوروناۆيرۋس جۇقتىرعان ناۋقاستى ەمدەۋگە جۇمسالاتىن اقشانىڭ كولەمى ايتىلعان ەدى. تاريفتەر ساناتقا بايلانىستى ءارتۇرلى بەكتىلگەن. ماسەلەن، شىلدەنىڭ باسىنا دەيىن كارانتيندەگى ءار ناۋقاسقا – 10,4 مىڭ تەڭگە، پروۆيزورلى بولىمدە – 11,6 مىڭ تەڭگە، ينفەكتسيالىق – 15,1 مىڭ تەڭگە ءبولىنىپ كەلگەن. سونىمەن قاتار، ۆيرۋسقا قارسى پرەپاراتتار اۋرۋحانالاردا قولدانعاننان كەيىن مەديتسينالىق ۇيىمدارعا بولەك تولەنەدى.
كورشى قىرعىزستاندا جالپى ەمدەۋ كۋرسىنا ناۋقاستىڭ جاعدايىنا قاراي 3-132 مىڭ سوم ارالىعىندا قارجى جۇمسالادى.
قازاقستاندا پاندەميا باستالعالى بيلىك مويىنداعان 132 354 جاعداي (U07.1+U07.2) تىركەلدى. ىندەتتىڭ كەسىرىنەن 1 907 ادام (U07.1+U07.2) قايتىس بولدى، ونىڭ 898-ى تەك تامىزعا تيەسىلى. الايدا جالپى ساناققا كوروناۆيرۋستىڭ جاناما اسەرىنەن قايتىس بولعان جۇزدەگەن ادام ەنگىزىلمەگەن. رەسمي ستاتيستيكا بويىنشا, بۇگىنگى تاڭدا كوروناۆيرۋس انىقتالعان 106 مىڭ ادامنىڭ 98 مىڭعا جۋىعى ساۋىعىپ شىققان. ال كوروناۆيرۋستىق پنەۆمونياعا شالدىققانداردىڭ تەك بەستەن ءبىر بولىگى عانا اۋرۋىنان ايىققان. ياعني 26 مىڭنان استام ناۋقاستىڭ ەمدەلگەنى 6 مىڭداي عانا.
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟
#قاڭتار2022: الماتىدا "اۋەجاي ءىسى" بويىنشا سوت ۇكىمى شىقتى – جۋرناليست، مۇعالىم، جۇرگىزۋشى...
مەملەكەت جانە قوعام قايراتكەرى جاسارال قۋانىشالين ومىردەن وزدى
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
ەرمۇرات باپي: مەملەكەتتەن جاناشىرلىق كورمەگەن حالىق بيلىككە تاسبۇيرەك بولادى