Düniejüzilik densaulıq saqtau wyımınıñ ökilderi
Qazaqstandağı koronavirustıq ahualdı nazarğa alıp, eskertu jasadı.

Elde karantin talaptarı 17 şildeden jeñildetilip, twrğındar birtindep qalıptı ömir süruge köşe bastaydı. Degenmen halıqaralıq wyımnıñ COVID-19 boyınşa tehnikalıq sarapşısı Vitaliy Stecik qwzırlı organdar bekitken sanitarlıq talaptardı orındap, maska tağıp, sanitayzer qoldanıp jüru kerektigin eskertti. Sebebi Qazaqstanda künine 300-den astam keys tirkelip, däri-därmek tapşılığı negizgi mäselege aynalğan.

Sarapşı Vitaliy Stecik: «Barlıq elde karantindik şaralar jeñildetilip jatqanımen osığan deyin nätijeli bolıp kelgen talaptardı orındamau dwrıs emes. Tiimdi vakcinanıñ şıqqanın kütip otırmız. Soğan qaramastan infekciyadan qorğanudı wmıtpau kerek», – deydi.

Qazaqstan Densaulıq saqtau ministrligi jariyalağan mälimetterge süyensek, 16 tamızda elde 337 adamnan koronavirus infekciyası anıqtaldı. Virus jwqtırğan 165 adamda auru belgileri bolğan, 172 adamda koronavirus simptomı bayqalmağan. Sonımen qatar osı uaqıtqa deyin virus deregi tirkelgender sanı 103 033-ke jetken. Epidemiya bastalğalı beri 82 777 adam aurudan ayıqqan.

Äytkenmen, Qazaqstan ükimeti wsınğan derekter men DDSW rastağan resmi mälimetter arasında ülken ayırmaşılıq bayqaladı. Halıqaralıq wyım Qazaqstanda koronavirus jwqtırğandar 119 781 adamğa jetkenin resmi türde rastap otır. Sebebi wyım belgileri koronavirusqa wqsaytın pnevmoniyağa şaldıqqandardı Covid statistikasına qosıp eseptegen. Biraq bwl sanatqa tek 1 tamızdan beri tirkelgender ğana engizildi.

"The Qazaq Times"