ددسۇ قازاقستانعا ەسكەرتۋ جاسادى

دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى
قازاقستانداعى كوروناۆيرۋستىق احۋالدى نازارعا الىپ، ەسكەرتۋ جاسادى.

ەلدە كارانتين تالاپتارى 17 شىلدەدەن جەڭىلدەتىلىپ، تۇرعىندار بىرتىندەپ قالىپتى ءومىر سۇرۋگە كوشە باستايدى. دەگەنمەن حالىقارالىق ۇيىمنىڭ COVID-19 بويىنشا تەحنيكالىق ساراپشىسى ۆيتالي ستەتسيك قۇزىرلى ورگاندار بەكىتكەن سانيتارلىق تالاپتاردى ورىنداپ، ماسكا تاعىپ، سانيتايزەر قولدانىپ ءجۇرۋ كەرەكتىگىن ەسكەرتتى. سەبەبى قازاقستاندا كۇنىنە 300-دەن استام كەيس تىركەلىپ، ءدارى-دارمەك تاپشىلىعى نەگىزگى ماسەلەگە اينالعان.

ساراپشى ۆيتالي ستەتسيك: «بارلىق ەلدە كارانتيندىك شارالار جەڭىلدەتىلىپ جاتقانىمەن وسىعان دەيىن ناتيجەلى بولىپ كەلگەن تالاپتاردى ورىنداماۋ دۇرىس ەمەس. ءتيىمدى ۆاكتسينانىڭ شىققانىن كۇتىپ وتىرمىز. سوعان قاراماستان ينفەكتسيادان قورعانۋدى ۇمىتپاۋ كەرەك»، – دەيدى.

قازاقستان دەنساۋلىق ساقتاۋ مينيسترلىگى جاريالاعان مالىمەتتەرگە سۇيەنسەك، 16 تامىزدا ەلدە 337 ادامنان كوروناۆيرۋس ينفەكتسياسى انىقتالدى. ۆيرۋس جۇقتىرعان 165 ادامدا اۋرۋ بەلگىلەرى بولعان، 172 ادامدا كوروناۆيرۋس سيمپتومى بايقالماعان. سونىمەن قاتار وسى ۋاقىتقا دەيىن ۆيرۋس دەرەگى تىركەلگەندەر سانى 103 033-كە جەتكەن. ەپيدەميا باستالعالى بەرى 82 777 ادام اۋرۋدان ايىققان.

ايتكەنمەن، قازاقستان ۇكىمەتى ۇسىنعان دەرەكتەر مەن ددسۇ راستاعان رەسمي مالىمەتتەر اراسىندا ۇلكەن ايىرماشىلىق بايقالادى. حالىقارالىق ۇيىم قازاقستاندا كوروناۆيرۋس جۇقتىرعاندار 119 781 ادامعا جەتكەنىن رەسمي تۇردە راستاپ وتىر. سەبەبى ۇيىم بەلگىلەرى كوروناۆيرۋسقا ۇقسايتىن پنەۆمونياعا شالدىققانداردى Covid ستاتيستيكاسىنا قوسىپ ەسەپتەگەن. بىراق بۇل ساناتقا تەك 1 تامىزدان بەرى تىركەلگەندەر عانا ەنگىزىلدى.

"The Qazaq Times"