Bir kün bwrın saytımızda Wyğır audanındağı mäsele boyınşa Almatı oblısınıñ äkim Amandıq Batalovtıñ nazarına arnayı material jariyalanğan bolatın (mına siltemeden köre alasız https://qazaqtimes.com/article/77824). Materialda Wyğır audanına qarastı Aqtam jäne Tiirmen auıldarındağı wltaralıq tatulıqqa jik tüsirui mümkin jayttar turasında bayan etildi. Sonıñ negizinde audan köleminde ideologiya, jastar tärbiesi, jastardı otansüygiştikke baulu isteriniñ aqsap twrğanın eskertip, wltaralıq arazdıq tudıruı mümkin ıqtimal qaterler jöninde oblıs äkiminiñ nazar audaruın talap etken edik.

Talabımız jerde qalmaptı, bügin oblıs äkiminiñ baspasöz hatşısı Ğalmwrat Jükel redakciyamızğa Wyğır audanındağı mäsele boyınşa oblıs tarabınıñ resmi jauabın berdi. Ğalmwrat Jükeldiñ jibergen jauabı mınaday:

Wyğır audanındağı mäselege qatıstı oblıstıq komissiya qwrılıp, öñirde jwmıs jürgizdi. Nätijesinde Aqtam orta mektebiniñ direktorı Izmahunov Oktyabr' Turganoviç, direktordıñ tärbie isi jönindegi orınbasarı Qapsalamov Mwqametqali lauazımdarınan bosatıldı. Sonımen birge atalmış mekteptiñ biologiya päniniñ mwğalimi Kaharova Türdibuvi de qızmetinen bosatıldı.

Bwdan bölek Aqtam auıldıq okrugi äkimi apparatınıñ sport jönindegi ädisker- nwsqauşısı Kamaev Sabirjan Sunyacunoviç jäne Tiirmen auıldıq okrugi äkimi apparatınıñ jastar isi jönindegi ädisker- nwsqauşısı YAkyarova Umida qızmetinen bosatıldı.

Aldağı uaqıtta atalğan jayttardıñ qaytalandası üşin oblıstıq komissiya müşesi oblıstıq Qazaqstan halqı assambleyasınıñ hatşılıq meñgeruşisi Ğabit Twrsınbay audan belsendilerimen jüzdesip, tüsindirme jwmıstarın jürgizdi. Audan halqı "bir qwmalaqtıñ" kesirinen twtas öñirge söz tigenin alğa tartıp, mwnday keleñsiz jayttıñ orın alğanına ötinişterin bildirdi.

Qordalanğan jaytter memleket twtastığına qatıstı näzik mäsele bolğandıqtan da, oblıs äkiminiñ nazar audaruı äbden orındı. Oblıs tarabınan qwrılğan komissiya şeşimi öñirdegi qordalağan mäseleni şeşude ayıptı delingen adamdardı jwmıstan quumen şektelmey, aldağı uaqıtta öñirdegi ideologiyalıq qızmetti nazarınan şığarmaydı degen ümittemiz.

“The Qazaq Times”