ءبىر كۇن بۇرىن سايتىمىزدا ۇيعىر اۋدانىنداعى ماسەلە بويىنشا الماتى وبلىسىنىڭ اكىم اماندىق باتالوۆتىڭ نازارىنا ارنايى ماتەريال جاريالانعان بولاتىن (مىنا سىلتەمەدەن كورە الاسىز https://qazaqtimes.com/article/77824). ماتەريالدا ۇيعىر اۋدانىنا قاراستى اقتام جانە تيىرمەن اۋىلدارىنداعى ۇلتارالىق تاتۋلىققا جىك ءتۇسىرۋى مۇمكىن جايتتار تۋراسىندا بايان ەتىلدى. سونىڭ نەگىزىندە اۋدان كولەمىندە يدەولوگيا، جاستار تاربيەسى، جاستاردى وتانسۇيگىشتىككە باۋلۋ ىستەرىنىڭ اقساپ تۇرعانىن ەسكەرتىپ، ۇلتارالىق ارازدىق تۋدىرۋى مۇمكىن ىقتيمال قاتەرلەر جونىندە وبلىس اكىمىنىڭ نازار اۋدارۋىن تالاپ ەتكەن ەدىك.

تالابىمىز جەردە قالماپتى، بۇگىن وبلىس اكىمىنىڭ ءباسپاسوز حاتشىسى عالمۇرات جۇكەل رەداكتسيامىزعا ۇيعىر اۋدانىنداعى ماسەلە بويىنشا وبلىس تارابىنىڭ رەسمي جاۋابىن بەردى. عالمۇرات جۇكەلدىڭ جىبەرگەن جاۋابى مىناداي:

ۇيعىر اۋدانىنداعى ماسەلەگە قاتىستى وبلىستىق كوميسسيا قۇرىلىپ، وڭىردە جۇمىس جۇرگىزدى. ناتيجەسىندە اقتام ورتا مەكتەبىنىڭ ديرەكتورى يزماحۋنوۆ وكتيابر تۋرگانوۆيچ، ديرەكتوردىڭ تاربيە ءىسى جونىندەگى ورىنباسارى قاپسالاموۆ مۇقامەتقالي لاۋازىمدارىنان بوساتىلدى. سونىمەن بىرگە اتالمىش مەكتەپتىڭ بيولوگيا ءپانىنىڭ مۇعالىمى كاحاروۆا ءتۇرديبۋۆي دە قىزمەتىنەن بوساتىلدى.

بۇدان بولەك اقتام اۋىلدىق وكرۋگى اكىمى اپپاراتىنىڭ سپورت جونىندەگى ادىسكەر- نۇسقاۋشىسى كاماەۆ سابيرجان سۋنياتسۋنوۆيچ جانە تيىرمەن اۋىلدىق وكرۋگى اكىمى اپپاراتىنىڭ جاستار ءىسى جونىندەگى ادىسكەر- نۇسقاۋشىسى ياكياروۆا ۋميدا قىزمەتىنەن بوساتىلدى.

الداعى ۋاقىتتا اتالعان جايتتاردىڭ قايتالانداسى ءۇشىن وبلىستىق كوميسسيا مۇشەسى وبلىستىق قازاقستان حالقى اسسامبلەياسىنىڭ حاتشىلىق مەڭگەرۋشىسى عابيت تۇرسىنباي اۋدان بەلسەندىلەرىمەن جۇزدەسىپ، تۇسىندىرمە جۇمىستارىن جۇرگىزدى. اۋدان حالقى ء"بىر قۇمالاقتىڭ" كەسىرىنەن تۇتاس وڭىرگە ءسوز تيگەنىن العا تارتىپ، مۇنداي كەلەڭسىز جايتتىڭ ورىن العانىنا وتىنىشتەرىن ءبىلدىردى.

قوردالانعان جايتتەر مەملەكەت تۇتاستىعىنا قاتىستى نازىك ماسەلە بولعاندىقتان دا، وبلىس اكىمىنىڭ نازار اۋدارۋى ابدەن ورىندى. وبلىس تارابىنان قۇرىلعان كوميسسيا شەشىمى وڭىردەگى قوردالاعان ماسەلەنى شەشۋدە ايىپتى دەلىنگەن ادامداردى جۇمىستان قۋمەن شەكتەلمەي، الداعى ۋاقىتتا وڭىردەگى يدەولوگيالىق قىزمەتتى نازارىنان شىعارمايدى دەگەن ۇمىتتەمىز.

“The Qazaq Times”