Almatı oblısınıñ basşılığında 13 jıldan beri qızmet etip kele jatqan Amandıq Batalov. Foto: zhetysu.gov.kz

Almatı oblısınıñ äkimi Amandıq Batalov qazaqstandıq qoğamda wzaq jıldar boyı dauğa aynalğan Wyğır audanınıñ atauın özgertu jönindegi uädesiniñ «dedlaynın» tağı özgertti.

Ol bıltır 4 qaraşada OKQ-inde ötken brifingte Wyğır audanı men audan ortalığı Şonjı atauların auıstıruğa qatıstı redakciya saualına «saylau qarsañında azamattardıñ twrğılıqtı jerin özgertuge bolmaytının» alğa tartqan.

«Jwmıs istelip jatır. Biraq qazirgi sätte bwl mäsele kün tärtibinde twrğan joq. Sebebi, qazir saylau nauqanı bastalayın dep jatır. Osınıñ aldında biz saylauşılardıñ tizimin naqtıladıq, saylau uçaskelerin tügendedik. Sol üşin osınday kezde köşeniñ atın, audannıñ atın auıstıru sekildi jwmıstardı isteuge bolmaydı. Qazir saylauşılardıñ twratın jerin özgertuge bolmaydı. Saylau nauqanı ötkennen keyin bwl mäselege qayta oralamız. Naqtı şeşimin sol kezde sizderge jetkizemiz», – dep edi äkim Amandıq Batalov bıltır qaraşada el aldında.

Sonda «saylau nauqanı ötkennen keyin bwl mäselege qayta oralamız» degen edi. Biraq arada bes ay ötse de äkim öz erkimen ün qatpadı. Äkimge, baspasöz hatşısına aptalap habarlassaq ta, ne Amandıq Batalov, ne Aydar Başbaevpen baylanısu mümkin bolmadı. Resmi swrau hat joldau arqılı jauap aldıq. Osılayşa alğaşqı qadamdı «qayta oraluğa» äm qwlaqtandıruğa söz bergen «Tıñdauşı memlekettiñ» äkimi emes, aqparat qwralı jasauğa mäjbür boldı.

Almatı oblısı äkiminiñ til damıtu, din-mädeniet isteri jäne işki sayasat bağıttarına jauaptı orınbasarı Ali Rustamnıñ atınan berilgen resmi jauapta Wlttıq sanaq sebep retinde aytıladı.

«Wyğır audanınıñ atauın özgertu qoldanıstağı zañnama talaptarına säykes jüzege asırılatın sayasi mañızı bar mäsele. Sonday-aq biılğı jılı Wlttıq sanaqtı ötkizu mindeti twr. YAğni, halıq sanağın ötkizu kezinde eldi meken, köşe atauların özgertuge bolmaydı», – deydi äkimdik.

Sonımen qosa, resmi jauapta Wyğır audanındağı «bilim beru wyımdarı (mektep, kitaphana) men eldi mekenderdiñ qwramdas bölikterine (köşelerge) äl-Farabidiñ, Abaydıñ, Dinmwhamed Qonaevtıñ, Mwqağali Maqataevtıñ esimderi berilude» delingen.

«Prezident äkimşiliginiñ tapsırmasına säykes, Wlttıq sanaqtı ötkizu maqsatında jariyalanğan şekteuge baylanıstı 2020 jılı äkimşilik-aumaqtıq birlikter men eldi mekenderdiñ qwramdas bölikterine atau beru jäne qayta atau boyınşa jwmıstar jürgizilmedi».

Äkimdik mälimetinşe, memleket menşigindegi infraqwrılım nısandarına, köşe-ğimarattarğa «atau beru jäne qayta atau, transkripciyasın naqtılau boyınşa barlığı 918 wsınıs tüsip otır». Olardıñ arasında 7 aumaqtıq bölinis, 904 köşe, 7 bilim oşağı atauı bar.

35 jıldan beri memlekettik basqaru isinde jürgen Batalov keyingi jiırma jılında oblıs äkimdiginde qızmet etip keledi. Dese de qoğamnıñ eñ sozılmalı mäselesiniñ biri Wyğır audanıniñ atauın onomastikalıq redakciyalau täjiribeli äkimge «bağınbas beleske» aynalğanday. Alayda Batalovqa köşe atauların özgertu qiın emes  tärizdi.

"The Qazaq Times"