«Bayjigit» baba» meşitiniñ bas imamı Amankeldi Jarasov kölik tizgininde.

 Wlıstıñ wlı küni Naurız meyramı qarsañında Şığıs Qazaqstan oblısı Tarbağatay audanında halıqtı quantqan bereketti is-şara ötti.

Tarbağatay audanınıñ äkimi Aqjar auıldıq «Bayjigit baba» meşitine «Niva» köligin sıyladı.

Audan basşısı öz sözinde: Audanda keri ağımdarğa qarsı küresti küşeytu, islamnıñ qwndılıqtarın nasihattau isiniñ asa mañızdı ekendigin ayta kele, osınday şaralarğa arnap halıq igiligine qızmet etsin dep kölik berip otırğandığın ayttı. Sonımen qatar imamdardıñ qızmetine sättilik tiledi.

«Wlıstıñ wlı küni qarsañında halqımız üşin asa bir quanıştı jağday boldı. Bwl bizge degen memleketimizdiñ qamqorlığı. Elbasımızdıñ jarqın sayasatınıñ arqası. Islamnıñ asıl qwndılıqtarın nasihattauda tınımsız eñbek etip, halıqtıñ senimin aqtaymız. Din üşin, meşit üşin kömek jasağan jandarğa izgi sauap bar ekendigi belgili» dep atap ötti, Aqjar auıldıq «Bayjigit» baba» meşitiniñ bas imamı Amankeldi Jarasov. Ol sonımen qatar audan basşılığına şınayı alğısın bildirdi.

Meşittiñ bosağasına baylanğan temir twlparğa äjeler şaşu şaşıp, märe-säre boldı. Aqsaqaldı qariya bata berip, elimizge tınıştıq tiledi.

“The Qazaq Times”