Industriya jäne infraqwrılımdıq damu ministrligi Qazaqstannıñ 11 qalasındağı äuejaylarda «aşıq aspan» rejimin engizu bastalğanın habarladı.

Ministrliktiñ aytuınşa, «Aşıq aspan» rejimin engizu turizmniñ damuına, «Astana» halıqaralıq qarjı ortalığınıñ köliktik qoljetimdilikti arttıruğa, jaña şeteldik tasımaldauşılardı tartuğa, jaña halıqaralıq bağdarlardıñ aşıluına, aviabiletter qwnınıñ tömendeuine jäne äue köliginiñ halıqtıñ qalıñ tobına qoljetimdi boluına ıqpal etedi.

Vedomstvo taratqan mälimdemede: «1 qaraşadan bastap Nwr-Swltan, Almatı, Şımkent, Aqtau, Qarağandı, Öskemen, Pavlodar, Kökşetau, Taraz, Petropavl, Semey qalalarınıñ äuejaylarında reysterdiñ sanı boyınşa şekteulerdi alıp tastaudı jäne qazaqstandıq tasımaldauşılar jüzege asırmaytın bağıttar boyınşa şeteldik aviakompaniyalarğa 5 därejeli «aua erkindigin» wsınudı közdeytin «aşıq aspan» rejimi engiziledi», — delingen.

Halıqqa joldauında äue bileti bağasınıñ qımbat ekenin aytqan prezident Qasım-Jomart Toqaev osı mäseleni şeşu jönindebwyrıq bergen bolatın. Keyinnen sol kezdegi QR Industriya jäne infraqwrılımdıq damu ministri Roman Sklyar prezidenttiñ «wşaq bileti qımbat» degen sınına qatıstı mäseleniñ retteletinin aytqan.

Al 7 qazanda ötken Ükimet otırısında prem'er-ministr Asqar Mamin otandıq äuejaylarda şeteldik aviakompaniyalar üşin «aşıq aspan» rejimin wsınu jwmısın belsendi jürgizudi, sonımen qatar, «Samwrıq-Qazına» qorına 2020 jılı memlekettik holdingtiñ basqaruındağı aviakompaniyalardıñ äue kemeleri parkin wlğaytudı jäne olardıñ wşu geografiyasın keñeytudi qamtamasız etudi tapsırğan.

"The Qazaq Times"