يندۋستريا جانە ينفراقۇرىلىمدىق دامۋ مينيسترلىگى قازاقستاننىڭ 11 قالاسىنداعى اۋەجايلاردا «اشىق اسپان» رەجيمىن ەنگىزۋ باستالعانىن حابارلادى.

مينيسترلىكتىڭ ايتۋىنشا، «اشىق اسپان» رەجيمىن ەنگىزۋ ءتۋريزمنىڭ دامۋىنا، «استانا» حالىقارالىق قارجى ورتالىعىنىڭ كولىكتىك قولجەتىمدىلىكتى ارتتىرۋعا، جاڭا شەتەلدىك تاسىمالداۋشىلاردى تارتۋعا، جاڭا حالىقارالىق باعدارلاردىڭ اشىلۋىنا، اۆيابيلەتتەر قۇنىنىڭ تومەندەۋىنە جانە اۋە كولىگىنىڭ حالىقتىڭ قالىڭ توبىنا قولجەتىمدى بولۋىنا ىقپال ەتەدى.

ۆەدومستۆو تاراتقان مالىمدەمەدە: «1 قاراشادان باستاپ نۇر-سۇلتان، الماتى، شىمكەنت، اقتاۋ، قاراعاندى، وسكەمەن، پاۆلودار، كوكشەتاۋ، تاراز، پەتروپاۆل، سەمەي قالالارىنىڭ اۋەجايلارىندا رەيستەردىڭ سانى بويىنشا شەكتەۋلەردى الىپ تاستاۋدى جانە قازاقستاندىق تاسىمالداۋشىلار جۇزەگە اسىرمايتىن باعىتتار بويىنشا شەتەلدىك اۆياكومپانيالارعا 5 دارەجەلى «اۋا ەركىندىگىن» ۇسىنۋدى كوزدەيتىن «اشىق اسپان» رەجيمى ەنگىزىلەدى»، — دەلىنگەن.

حالىققا جولداۋىندا اۋە بيلەتى باعاسىنىڭ قىمبات ەكەنىن ايتقان پرەزيدەنت قاسىم-جومارت توقاەۆ وسى ماسەلەنى شەشۋ جونىندەبۇيرىق بەرگەن بولاتىن. كەيىننەن سول كەزدەگى قر يندۋستريا جانە ينفراقۇرىلىمدىق دامۋ ءمينيسترى رومان سكليار پرەزيدەنتتىڭ «ۇشاق بيلەتى قىمبات» دەگەن سىنىنا قاتىستى ماسەلەنىڭ رەتتەلەتىنىن ايتقان.

ال 7 قازاندا وتكەن ۇكىمەت وتىرىسىندا پرەمەر-مينيستر اسقار مامين وتاندىق اۋەجايلاردا شەتەلدىك اۆياكومپانيالار ءۇشىن «اشىق اسپان» رەجيمىن ۇسىنۋ جۇمىسىن بەلسەندى جۇرگىزۋدى، سونىمەن قاتار، «سامۇرىق-قازىنا» قورىنا 2020 جىلى مەملەكەتتىك حولدينگتىڭ باسقارۋىنداعى اۆياكومپانيالاردىڭ اۋە كەمەلەرى پاركىن ۇلعايتۋدى جانە ولاردىڭ ۇشۋ گەوگرافياسىن كەڭەيتۋدى قامتاماسىز ەتۋدى تاپسىرعان.

"The Qazaq Times"