Przident Toqaev pen onıñ baspasöz hatşısı Berik Uäli. Foto: Sputnik / Vladislav Vodnev

Qoğamda dümpu tudırğan prezident Toqaevtıñ atışulı №184 jarlığına baylanıstı Aqorda hatşısı ädilet ministriniñ sözin teristep, qayta tüsinik berdi.

Memleket basşısınıñ baspasöz hatşısı Berik Uäli qazannıñ 9-ı küşine engen, azamattıq qoğamnıñ sınına wşırağan «eski qoldan tağayındau» jarlığına qatıstı BAQ ökilderine bergen swhbatında «ädilet ministri jarlıqtı dwrıs tüsindirmedi» dep mälimdedi.

Ädilet ministri Marat Beketaevtıñ «tüsiniksiz tağayındauşı» taqırıbı boyınşa «soñğı sözdi qauipsizdik keñesi aytadı» degen pikiri bwqaranıñ «qos bilik» jaylı küdigin küşeyte tüsken bolatın. Jarlıqtı ekinşi ret tüsindiruge tırısqan Berik Uäli «Toqaev Nazarbaevpen keñese alatının, biraq kadr mäselesin özi şeşetinin» aytıp, Beketaevtıñ sözin joqqa şığardı. Ol:

– Ädilet ministri dwrıs tüsindirmedi dep sanaymın. Bälkim, jurnalisterdiñ qısımımen Marat Beketaev sasqalaqtap, oyın dwrıs jetkize almay qalğan bolar, mwnday deñgeydegi lauazımdı twlğa kez kelgen mäseleni käsibi twrğıda naqtı tüsindirui tiis qoy, – dedi aqparat agenttikteriniñ birine.

Qazaqstan qoğamın azan-qazan qılğan qazandağı Toqaev qol qoyğan  «QR Prezidentiniñ keybir aktilerine özgerister men tolıqtırular engizu turalı» jarlıq boyınşa äkimder men ministrler (sırtqı ister, işki ister jäne qorğanıs ministrlerinen özge), qauipsizdik keñesiniñ törağası, sırtqı barlau qızmetiniñ jetekşisi, bas prokuror, wlttıq bank törağası, prezident äkimşiliginiñ jetekşisi, küştik qwrılım basşıları jäne tağı köptegen memlekettik lauazım ielerin tağayındau Qauipsizdik keñesiniñ törağası Nazarbaevtıñ kelisimimen ğana jüzege asadı.

Däyek-replika:

 Ädilet ministrligine qarastı Zañnama jäne qwqıqtıq aqparat institutınıñ «Qazaqstan Respublikası normativtik qwqıqtıq aktileriniñ aqparattıq-qwqıqtıq jüyesine» ornalastırılğan «Qazaqstan Respublikası Prezidentiniñ keybir aktilerine özgerister men tolıqtırular engizu turalı» jarlıqtan üzindi:

2-1-tarmağı: «Ortalıq atqaruşı organdardıñ jäne oblıstardıñ, respublikalıq mañızı bar qalalardıñ jäne astananıñ jergilikti atqaruşı organdarınıñ, sonday-aq Qazaqstan Respublikasınıñ Prezidentine tikeley bağınatın jäne esep beretin memlekettik organdardıñ birinşi basşıları lauazımına tağayındauğa wsınılatın (qarastırılatın) kandidaturalar Qazaqstan Respublikası Qauipsizdik Keñesiniñ Törağasımen kelisiluge tiis».

14-tarmağı: «Memleket basşısı, Äkimşilik Basşısı nemese özge de lauazımdı adamdar belgilengen tärtippen tiisti şeşim şığarğanğa deyin, olarmen kelisiluge tiis kandidaturalardı qızmetke tağayındau jäne qızmetten bosatu turalı aktilerdi qabıldauğa jol berilmeydi».

"The Qazaq Times"