اقوردا حاتشىسى ادىلەت ءمينيسترىنىڭ ءسوزىن تەرىستەدى

قوعامدا ءدۇمپۋ تۋدىرعان پرەزيدەنت توقاەۆتىڭ اتىشۋلى №184 جارلىعىنا بايلانىستى اقوردا حاتشىسى ادىلەت ءمينيسترىنىڭ ءسوزىن تەرىستەپ، قايتا تۇسىنىك بەردى.

مەملەكەت باسشىسىنىڭ ءباسپاسوز حاتشىسى بەرىك ءۋالي قازاننىڭ 9-ى كۇشىنە ەنگەن، ازاماتتىق قوعامنىڭ سىنىنا ۇشىراعان «ەسكى قولدان تاعايىنداۋ» جارلىعىنا قاتىستى باق وكىلدەرىنە بەرگەن سۇحباتىندا «ادىلەت ءمينيسترى جارلىقتى دۇرىس تۇسىندىرمەدى» دەپ مالىمدەدى.

ادىلەت ءمينيسترى مارات بەكەتاەۆتىڭ «تۇسىنىكسىز تاعايىنداۋشى» تاقىرىبى بويىنشا «سوڭعى ءسوزدى قاۋىپسىزدىك كەڭەسى ايتادى» دەگەن پىكىرى بۇقارانىڭ «قوس بيلىك» جايلى كۇدىگىن كۇشەيتە تۇسكەن بولاتىن. جارلىقتى ەكىنشى رەت تۇسىندىرۋگە تىرىسقان بەرىك ءۋالي «توقاەۆ نازارباەۆپەن كەڭەسە الاتىنىن، بىراق كادر ماسەلەسىن ءوزى شەشەتىنىن» ايتىپ، بەكەتاەۆتىڭ ءسوزىن جوققا شىعاردى. ول:

– ادىلەت ءمينيسترى دۇرىس تۇسىندىرمەدى دەپ سانايمىن. بالكىم، جۋرناليستەردىڭ قىسىمىمەن مارات بەكەتاەۆ ساسقالاقتاپ، ويىن دۇرىس جەتكىزە الماي قالعان بولار، مۇنداي دەڭگەيدەگى لاۋازىمدى تۇلعا كەز كەلگەن ماسەلەنى كاسىبي تۇرعىدا ناقتى ءتۇسىندىرۋى ءتيىس قوي، – دەدى اقپارات اگەنتتىكتەرىنىڭ بىرىنە.

قازاقستان قوعامىن ازان-قازان قىلعان قازانداعى توقاەۆ قول قويعان  «قر پرەزيدەنتىنىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ تۋرالى» جارلىق بويىنشا اكىمدەر مەن مينيسترلەر (سىرتقى ىستەر، ىشكى ىستەر جانە قورعانىس مينيسترلەرىنەن وزگە), قاۋىپسىزدىك كەڭەسىنىڭ توراعاسى، سىرتقى بارلاۋ قىزمەتىنىڭ جەتەكشىسى، باس پروكۋرور، ۇلتتىق بانك توراعاسى، پرەزيدەنت اكىمشىلىگىنىڭ جەتەكشىسى، كۇشتىك قۇرىلىم باسشىلارى جانە تاعى كوپتەگەن مەملەكەتتىك لاۋازىم يەلەرىن تاعايىنداۋ قاۋىپسىزدىك كەڭەسىنىڭ توراعاسى نازارباەۆتىڭ كەلىسىمىمەن عانا جۇزەگە اسادى.

دايەك-رەپليكا:

 ادىلەت مينيسترلىگىنە قاراستى زاڭناما جانە قۇقىقتىق اقپارات ينستيتۋتىنىڭ «قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ اقپاراتتىق-قۇقىقتىق جۇيەسىنە» ورنالاستىرىلعان «قازاقستان رەسپۋبليكاسى پرەزيدەنتىنىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ تۋرالى» جارلىقتان ءۇزىندى:

2-1-تارماعى: «ورتالىق اتقارۋشى ورگانداردىڭ جانە وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى اتقارۋشى ورگاندارىنىڭ، سونداي-اق قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ ءبىرىنشى باسشىلارى لاۋازىمىنا تاعايىنداۋعا ۇسىنىلاتىن (قاراستىرىلاتىن) كانديداتۋرالار قازاقستان رەسپۋبليكاسى قاۋىپسىزدىك كەڭەسىنىڭ توراعاسىمەن كەلىسىلۋگە ءتيىس».

14-تارماعى: «مەملەكەت باسشىسى، اكىمشىلىك باسشىسى نەمەسە وزگە دە لاۋازىمدى ادامدار بەلگىلەنگەن تارتىپپەن ءتيىستى شەشىم شىعارعانعا دەيىن، ولارمەن كەلىسىلۋگە ءتيىس كانديداتۋرالاردى قىزمەتكە تاعايىنداۋ جانە قىزمەتتەن بوساتۋ تۋرالى اكتىلەردى قابىلداۋعا جول بەرىلمەيدى».

"The Qazaq Times"