Bügin Almatı qalalıq Äleumettik äl-auqat basqarmasınıñ ğimaratında «Oralman märtebesin beru nemese wzartu» memlekettik qızmeti» taqırıbındağı döñgelek üstel ötti. Qwzırlı mekemeler men qoğamdıq wyımdar jäne BAQ ökilderi qatısqan jinalısta elge oralğan qandastardıñ qwjattıq qiınşılığına baylanıstı mäseleler talqılandı.

Almatı qalalıq Äleumettik äl-auqat basqarması Köşi-qon jüyeleri men «Adırna» qoğamdıq wyımı birlese wyımdastırğan döñgelek üstelge QR İİM Almatı qalası Policiya departamenti Köşi-qon qızmeti basqarmasınıñ, Düniejüzi Qazaq Qauımdastığınıñ, Qazaq wlttıq universiteti Dayındıq fakul'tetiniñ, «Jebeu» qoğamdıq birlestiginiñ ökilderi qatıstı.

Küoparan Temeşqızı. Foto: QT.

Almatı oblıstıq Köşi-qon basqarmasınıñ ökilderi de şaqırılğan, alayda atalğan mekemeniñ ökilderi üstel basınan tabılmadı. Almatı oblısında qordalanğan qandastardıñ qwjattıq mäseleleriniñ köptigine qaramastan, bwğan deyingi osı mazmwndağı jinalıstarda da Almatı oblıstıq köşi-qon basqarması ökilderiniñ orını bos twratının basa aytqımız keledi.

Biıl 16 mausımda QR twñğış prezidenti N. Nazarbaevtıñ (№20-137 q-8) arnayı şeşimimen, qandastarğa bir jıldıq qwjattıq jeñildik jasauğa mümkindik tuğan bolatın.  Kezekti döñgelek üstelde Köşi-qon jüyeleri böliminiñ bas mamanı Külparan Ğalieva etnikalıq qazaqtardıñ «Oralman» kuäliginiñ merzimin ötkizip alğanına qaramastan jeñildetilgen tärtippen Qazaqstan Respublikasınıñ azamattığın ala alatındığı turalı tüsindire kelip, Almatı qalasın saqtalıp otırğan qandastardıñ qwjattıq mäselelerine baylanıstı naqtı swraqtarın ortağa qoydı.

Qandastandıñ qwjattıq mäselelerin talqılağan döñgelek üstel. Foto: QT.

Gülparan Temeşqızınıñ jetkizgen mälimetine qarağanda, qwjat merzimin ötkizip alğan qandastarğa jeñildikterdiñ berilip otırğanına qaramastan, Almatı qalasında «Oralman kuäliginiñ» merzimin ötkizip alğan qandastar arasında 80-i ğana qwjatın wzartuğa ötiniş bergen. Sonıñ işinde 34-i ıqtiyar hat aluğa ötiniş bergen. Gülparan hanım qalğan 50 qandasımız da biıl 31 jeltoqsanğa deyin qwjatın räsimdep ülgermese QR azamattığın ala almay qalatının eskertedi. Ol sonday-aq, döñgelek üstelge qatısıp otırğan Almatı qalalıq Policiya departamenti Köşi-qon qızmeti basqarmasınıñ policiya inspektorı Toqtabaev Birjan Janatwlına birneşe qandastardıñ naqtı qwjattıq mäselelerin şeşudi wsındı. Bwlardıñ arasında ata-anası QR azamattığın alğanımen «Oralman märtebesin» ala almağan balalarınıñ azamattıq ala almay otırğan mäseleleri de bar.

Birjan Janatwlı qwjat merziminiñ ötkizip alğan qandastarğa jasalğan jeñildik turasında BAQ arqılı qoğamğa jetkizuge tırısqandarın, alayda älide bwl mäselemen kelip jatqan qandastardıñ az ekenin jetkizdi. Sonday-aq, Külparan hanım wsınğan qalalıq köşi-qon qızmetine qatıstı mäselelerdi şeşuge küş salatının ayttı.

Qoğamdıq wyım ökilderi de öz wsınıstarın jetkizdi. Foto: QT.

Jinalısqa qatısqan qoğamdıq wyım ökilderi de naqtı mäseleler töñireginde öz oyların ortağa saldı. Olardıñ aytuınşa, qandastardıñ qwjattıq mäseleleriniñ köbi derlik oblıstarda bolıp otır. Jäne keybir jergilikti inspektorlardıñ qızmeti de köñil könşitpeydi. Bwğan qosa «oralman märtebesiniñ» wzartıluı mäseleni bir qırınan şeşkenimen, keybir qandastardıñ QHR tölqwjattarınıñ uaqıtı ötip ketkeni de azamattıq aluına kedergi. Al, Qazaqstandağı Qıtay elşilikteri qwjat merzimi ötip ketkenderden Qıtayğa barıp qayta qwjat jasatudı talap etedi. Qazirgi Qıtaydağı sayasi jağday bwğan mümkindik bermeydi. Mine osı atalğan mäselelerde qandastardıñ el azamatı ataluına kedergi bolıp otır.

Jiında bwdan özge de qandastar mäselesine qatıstı taqırıptar talqılandı. Mıñdağan adamdı sarsañğa salğan keybir qwjattıq qiınşılıqtardı şeşu üşin qatıstı zañdarğa özgeris engizu kerek ekeni de aytıldı.

Döñgelek üstel basına jinalğan memlekettik mekemeler men qoğamdıq wyımdardıñ ökilderi talqılanğan taqırıp töñireginde birlese jwmıs isteuge kelisip tarqastı.

“The Qazaq Times”