Senat reglamentinen "qwrmetti senator" atağı alındı. Qazir mwnday ataq joq. 12 qañtarda Azattıq tilşisiniñ swrağına jauap bergen senat spikeri Mäulen Äşimbaev osılay dep mälimdedi. Üş jıl bwrın naurızda otstavkağa ketetinin mälimdegen soñ Nazarbaevqa "qwrmetti senator" atağı berilgen edi. Bwl turalı Ortalıq Aziya jañalıqtar qızmeti jazdı.

– Osıdan eki-üş apta bwrın senattıñ reglamentine tiisti özgerister engizildi. Sol kezde "qwrmetti senator" atağın reglamentten alıp tastadıq. Qazir bizde onday institut joq. Şeşim qabıldağan sebebimiz – bıltır mausımda ötken referendumda Konstituciyadan twñğış prezident elbasına qatıstı normalar alınıp tastaldı. Bwl halıqtıñ şeşimi. Erteñ twñğış prezident turalı zañnıñ küşi joyılayın dep jatır. Konstituciyalıq sottıñ tiisti şeşimi bar. Sonı eskerip, biz de reglamentten alıp tastağanbız. Sol sebepti bwl jerde eşqanday swraq boluı mümkin emes, - dedi Mäulen Äşimbaev.

Onıñ aytuınşa, Qazaqstannıñ senatı tarihında "qwrmetti senator" atağı tek eks-prezident Nwrswltan Nazarbaevta ğana bolğan. "Sonda bwl ataq Nazarbaev üşin arnayı şığarılğan ba?" degen Azattıq tilşisiniñ swrağına Äşimbaev naqtı jauap bermedi, biraq "tüsinikti ğoy bäri" dep solay ekenin "rastadı".

Nazarbaevqa "qwrmetti senator" atağın berudi 2019 jılı naurızda ant berip, Qazaqstan prezidenti qızmetine kirisken Qasım-Jomart Toqaev wsınğan. Sol jılı mamırda senat byurosınıñ müşeleri wsınıstı tügel qoldağan. Nwrswltan Nazarbaev 19 naurızda merziminen bwrın otstavkağa ketetinin mälimdegen edi.

Osı aptada Qazaqstannıñ Konstituciyalıq sotı bir top deputattıñ ötinişin qarap, "Twñğış prezident - Elbası" zañınıñ küşin joyğan.

  • 2000 jılı qabıldanğan "Twñğış prezident – Elbası zañı" eldiñ eks-prezidenti Nwrswltan Nazarbaev pen onıñ otbasına köp basımdıq beredi. Zañğa say, Nazarbaev pen onıñ otbası müşeleri qılmıstıq jauapkerşilikke tartılmaydı, qamalmaydı, mülikteri tärkilenbeydi, şekteu qoyılmaydı.
  • "Twñğış prezident" zañında Nazarbaev jäne onımen birge twratın otbası müşeleriniñ "banktik şottarınıñ qwpiyalığına jäne bank şottarına tiispeuge kepildik beriletini" jazılğan. Qoğamda "Elbası zañın" jeke basqa tabınu dep sınğa alğandar köp bolğan.
  • Sarapşılar Qañtar oqiğasınan soñ Nazarbaevtıñ bilikke ıqpalı älsiredi, al qazirgi prezident Qasım-Jomart Toqaevtıñ biligi küşeydi deydi. Toqaev öz sözderinde Nazarbaev pen onıñ aynalasın sınğa alıp, Nazarbaevtıñ jaqındarın qızmetten alğan. Nazarbaevtıñ ülken qızı Dariğa Nazarbaeva mäjilistegi deputattıq mandatın tapsırıp berdi. Eks-prezidentiñ nemere inisi Qayrat Satıbaldı men Nazarbaevtar äuletiniñ qwdası Qayrat Boranbaev "aqşa jımqıru" ayıbımen qamauğa alındı.