Qazaqstanda aqılı joldar sanı artpaq

Qazaqstanda aqılı joldar sanı artpaq.

Qañtardıñ soñında Almatı-Qapşağay, Almatı-Qorğas jäne Astana-Temirtau yağni jalpı üş bağıt boyınşa aqılı avtojoldar iske qosılğan. Olardıñ jalpı wzındığı – 471 şaqırım. Al 2022 jılğa qaray aqılı tas joldar wzındığı 6,5 mıñ şaqırımğa jetpek, Osı taqırıpqa qatıstı QR prem'er-ministri Asqar Mamin: «Bağdarlamanıñ mañızdı mindeti – halıqtıñ twrmıs sapasın arttıru. Jaña joldar salu jük tasımaldau kezinde biznes üşin köliktik şığındardı keminde 15%-ğa qısqartuğa mümkindik beredi. Ötken jıldıñ özinde 86 mıñnan astam jwmıs ornı qwrıldı. Biıl josparğa säykes tağı 54 mıñ jwmıs ornın qwru josparda bar. Bağdarlamanı iske asıru eldiñ köliktik äleuetin arttıruğa ülken serpin berdi. Ötken jılda tranzitten tüsken kiris 1,5 mlrd dollar qwradı», – dep mälimdedi.

Qazirgi uaqıtta kün sayın Almatıda 500 mıñ avtokölik qozğaladı. Onıñ 200 mıñı – qala sırtındağı aymaqtardan keletinder. Al aqılı joldan bölek, kölik keptelisi äli de kün tärtibinde twrğan mäselelerdiñ biri. Industriya jäne infraqwrılımdı damıtu ministri Roman Sklyar: «Aqılı joldardan keletin kiris 40 mlrd teñgege jetedi. Bwl avtokölik joldarına jwmsalatın qarjını qısqartuğa mümkindik beredi», – deydi.

Jalpı alğanda jıl sayın Qazaqstanda aqılı joldar sanı artıp keledi. Osı rette älemdik täjiribege zer salsaq, London, Mäskeu, Stokgol'm, Singapur, tağı basqa da elder aqılı jol jüyesin engizgen. Bwl jüyeni engizbes bwrın atalğan memleketter, aldımen, halıqtıñ twrmıs-tirgiligine, aymaqtardağı jol-kölik mäselelerine köp min bergen. Mäselen, Stokgol'm biligi halıqqa aqılı joldıñ ne üşin kerek ekenin tüsindirip, bükil halıqtıq referendum ötkizdi. Är taraptarmen belsendi kelissözder jürgizdi. Al joğarıda atalğan memleketterdiñ äleumettik jağdayına män berer bolsaq, Qazaqstan äleueti mwnday özgeriske birden dayın bolmaytını anıq.

"The Qazaq Times"