قازاقستاندا اقىلى جولدار سانى ارتپاق.

قاڭتاردىڭ سوڭىندا الماتى-قاپشاعاي، الماتى-قورعاس جانە استانا-تەمىرتاۋ ياعني جالپى ءۇش باعىت بويىنشا اقىلى اۆتوجولدار ىسكە قوسىلعان. ولاردىڭ جالپى ۇزىندىعى – 471 شاقىرىم. ال 2022 جىلعا قاراي اقىلى تاس جولدار ۇزىندىعى 6,5 مىڭ شاقىرىمعا جەتپەك، وسى تاقىرىپقا قاتىستى قر پرەمەر-ءمينيسترى اسقار مامين: «باعدارلامانىڭ ماڭىزدى مىندەتى – حالىقتىڭ تۇرمىس ساپاسىن ارتتىرۋ. جاڭا جولدار سالۋ جۇك تاسىمالداۋ كەزىندە بيزنەس ءۇشىن كولىكتىك شىعىنداردى كەمىندە 15%-عا قىسقارتۋعا مۇمكىندىك بەرەدى. وتكەن جىلدىڭ وزىندە 86 مىڭنان استام جۇمىس ورنى قۇرىلدى. بيىل جوسپارعا سايكەس تاعى 54 مىڭ جۇمىس ورنىن قۇرۋ جوسپاردا بار. باعدارلامانى ىسكە اسىرۋ ەلدىڭ كولىكتىك الەۋەتىن ارتتىرۋعا ۇلكەن سەرپىن بەردى. وتكەن جىلدا ترانزيتتەن تۇسكەن كىرىس 1,5 ملرد دوللار قۇرادى»، – دەپ مالىمدەدى.

قازىرگى ۋاقىتتا كۇن سايىن الماتىدا 500 مىڭ اۆتوكولىك قوزعالادى. ونىڭ 200 مىڭى – قالا سىرتىنداعى ايماقتاردان كەلەتىندەر. ال اقىلى جولدان بولەك، كولىك كەپتەلىسى ءالى دە كۇن تارتىبىندە تۇرعان ماسەلەلەردىڭ ءبىرى. يندۋستريا جانە ينفراقۇرىلىمدى دامىتۋ ءمينيسترى رومان سكليار: «اقىلى جولداردان كەلەتىن كىرىس 40 ملرد تەڭگەگە جەتەدى. بۇل اۆتوكولىك جولدارىنا جۇمسالاتىن قارجىنى قىسقارتۋعا مۇمكىندىك بەرەدى»، – دەيدى.

جالپى العاندا جىل سايىن قازاقستاندا اقىلى جولدار سانى ارتىپ كەلەدى. وسى رەتتە الەمدىك تاجىريبەگە زەر سالساق، لوندون، ماسكەۋ، ستوكگولم، سينگاپۋر، تاعى باسقا دا ەلدەر اقىلى جول جۇيەسىن ەنگىزگەن. بۇل جۇيەنى ەنگىزبەس بۇرىن اتالعان مەملەكەتتەر، الدىمەن، حالىقتىڭ تۇرمىس-تىرگىلىگىنە، ايماقتارداعى جول-كولىك ماسەلەلەرىنە كوپ ءمىن بەرگەن. ماسەلەن، ستوكگولم بيلىگى حالىققا اقىلى جولدىڭ نە ءۇشىن كەرەك ەكەنىن ءتۇسىندىرىپ، بۇكىل حالىقتىق رەفەرەندۋم وتكىزدى. ءار تاراپتارمەن بەلسەندى كەلىسسوزدەر جۇرگىزدى. ال جوعارىدا اتالعان مەملەكەتتەردىڭ الەۋمەتتىك جاعدايىنا ءمان بەرەر بولساق، قازاقستان الەۋەتى مۇنداي وزگەرىسكە بىردەن دايىن بولمايتىنى انىق.

"The Qazaq Times"