Bügin Qaskeleñniñ «Mädeniet üyinde»  aqın Esenqwl Jaqıpbektiñ öleñderine jazılğan änderdiñ «El erkesi – Esenqwl» attı Respublikalıq  änşiler bayqauı boldı.

Qazaqstan Ja­zuşılar odağınıñ mü­şesi, Prezident stipendiya­sınıñ, «Eñbektegi erligi üşin» medaliniñ iegeri, Mä­deniet salasınıñ üzdigi, belgili aytısker aqın Esenqwl Jaqıpbek ağamız ortamızdan ketkenine  2 jılday uaqıt boldı. Aqın ağamızdıñ ayaulı beynesi wrpaq jadınan wmıtılmaq emes, kerisinşe aqınnıñ izbasarları onıñ möldir öleñderin qayta jañğırtu üşin, keñinen nasihattau üşin respublikalıq konkurs ötkizdi. Wyımdastıruşılardıñ biri, kompozitor Bağlan Omarovtan erterekte swhbat alğanımızda, 40-50 adam qatısatındığın jetkizgen bolatın. Alayda bügingi bayqauda elimizdiñ tükpir-tükpirinen kelgen qatısuşılardıñ jalpı sanı 80-ge jetken.

Qatısuğa ötiniş bildirgenderdiñ barlığın (15-35 jas aralığındağılardı) tirkep, sahnağa şığatın rettik nömirleri anıqtalğan. Bayqau şartı boyınşa, önerin körsetuge kelgen är adam  eki ännen orındadı. Biri Esenqwl Jaqıpbektiñ sözine jazılğan änder bolsa, ekinşisi qatısuşınıñ özi tañdağan än.

Bayqaudağı qazılar qwramında QR Mädeniet salasınıñ üzdigi, kompozitor Bağlan Omarov, Qazaqstan jazuşılar odağı basqarma törağasınıñ orınbasarı J. Äşimjan, Qazaq ädebieti gazetiniñ bas redaktorı J.Şaştaywlı, Qarasay audanı Mädeniet jäne tilderdi damıtu böliminiñ basşısı E.O.Jwmataev, aqın, kompozitor, prodyuser B.Esebaev, QR Mädeniet salasınıñ üzdigi, änşi S. Medeuov bar.

Äzimhan Nazerke, qatısuşı: «Jambıl oblısı, Talas audanı, Oyıq aulınan kelip otırmın. Sayıstarğa köp qatısa bermeytinmin. Bir gruppalasım osınday sayıstıñ bolatının aytıp, bağımdı sınap köruime keñes berdi. Birden wyımdastıru komitetine habarlasıp ötiniş bildirdim. Basqa qalada bolğandıqtan resmi türde bügin tañerteñ tirkelip otırmın. Rettik nömirim – 69. Birinşi änim Esenqwl Jaqıpbektiñ «Alday-au» degen äni, ekinşisi halıq äni  «Dünie-ay».

Twrğanäli Şarap, qatısuşı: «Özim Qızılordanıñ, Jañaqorğan degen qalasınıñ tumasımın. Bıltır T.Jürgenev atındağı Qazaq Wlttıq Öner akademiyasın bitirdim. Rettik nömirim – 40. Orındağan birinşi änim «Öziñdi añsap», al ekinşisi  Keñes Düysekeevtiñ äni «Aralım-Armanım». Key adamdar köp körermen aldında sasqalaqtap jatadı, al mağan solay wnaydı. Oylañızşı. Seniñ dostarıñ bir töbe, odan bölek sağan nazar salıp otırğan körermen otırsa, qanday keremet, tipti sahnadan ketkiñ kelmeydi. Osı jolı sol körermenniñ azdığına nalıdım. Dese de özime berilgen tapsırmanı oydağıday alıp şıqtım dep oylaymın».

Altıngül Baqıthan, qatısuşı: «Pavlodar oblısı, Ekibastwz qalasınan keldim. Atalmış konkursqa qatısu turalı wsınıs tüskennen keyin, arnayı dayındaldıq. Birinşi ändi «MwzART-life» jobasınıñ qatısuşısı Erkebwlan Amantay ekeumiz Esenqwl ağamızdıñ sözine jazılğan, YAsira Zahanqızınıñ «Tau qızına» degen änin duetpen ayttıq. Al kelesi orındağanım «Tuğan el»   patriottıq äni. Sonay jaqtan kelgesin, eñbegiñniñ eş ketkenin qalamaysıñ ğoy. Barımdı saldım. Endigi jauabın kütu ğana qaldı».

Janarbek Äşimjan, Qazaqstan jazuşılar odağı basqarma törağasınıñ orınbasarı: «Esağañnıñ dünieden ötkenine az ğana uaqıt boldı. Bizde qanşama izdeusiz-swrausız qalğan tarihi twlğalar bar. Onıñ janında, osınday şaranı wyımdastırıp, respublikalıq bayqau jariyalau – aqınnıñ şığarmaşılığınıñ  öner süyer, jır süyer qazaqtıñ arasında odan äri keñinen nasihattaluına ıqpal jasau degen söz. Bügin qatısıp otırğan 80 adam, ärqaysı eki ännen aytatının eskersek, 160 än tıñdadıq. Esenqwl aqınnıñ sahnada orındalıp jürgen 15 şaqtı ğana äni bar. Sonı aynaldırıp orındap jatqandıqtan, bälkim, köp qatısuşılardıñ deñgeyi jetpey qalıp jattı. Degenmen,  «Jaña än» degen nominaciya boyınşa beriletin sıylıq bar. Sonıñ özi jastardıñ arasında bir stimul tudıradı dep oylaymın».

Ayta keteyik, Esenqwl Jaqıpbektiñ sözine jazılğan änder bayqauınıñ ötkiziluine qarjılay kömek körsetip, sponsorlıq etip otırğan Almatı oblısı, Qarasay audanınıñ äkimi – Mahabbat Bigeldiev. Erterekte mälimdegenimizdey, Konkurs qatısuşılarına beriletin  qarjılay sıylıq: üşinşi orınğa 100 mıñ, ekinşi orınğa 150 mıñ, birinşi orınğa 300 mıñ jäne bas jüldege 500 mıñ. Odan bölek ärbir qatısuşılarğa Esenqwl Jaqıpbektiñ tañdamalı öleñder jinağı beriledi.

Erteñ, 24 aqpan küni, sağat 15:00-de gala-koncert. Bügingi irikteude eñ üzdik öner körsetken 4-5 qatısuşı jäne  Bekjan Twrıs, Sayat Medeuov, Dosımjan Tañatarov, Bağlan Äbdrayımov, Äset Esjan, Qanat Ümbetov pen Äliya Äbiken, t.b. öner ieleri qatısadı.

Ötetin ornı: Qarasay audanı, Qaskeleñ «Mädeniet üyi».

«The Qazaq Times»