"ەل ەركەسى – ەسەنقۇل"

بۇگىن قاسكەلەڭنىڭ «مادەنيەت ۇيىندە»  اقىن ەسەنقۇل جاقىپبەكتىڭ ولەڭدەرىنە جازىلعان اندەردىڭ «ەل ەركەسى – ەسەنقۇل» اتتى رەسپۋبليكالىق  انشىلەر بايقاۋى بولدى.

قازاقستان جا­زۋشىلار وداعىنىڭ ءمۇ­شەسى، پرەزيدەنت ستيپەنديا­سىنىڭ، «ەڭبەكتەگى ەرلىگى ءۇشىن» مەدالىنىڭ يەگەرى، ءما­دەنيەت سالاسىنىڭ ۇزدىگى، بەلگىلى ايتىسكەر اقىن ەسەنقۇل جاقىپبەك اعامىز ورتامىزدان كەتكەنىنە  2 جىلداي ۋاقىت بولدى. اقىن اعامىزدىڭ اياۋلى بەينەسى ۇرپاق جادىنان ۇمىتىلماق ەمەس، كەرىسىنشە اقىننىڭ ءىزباسارلارى ونىڭ ءمولدىر ولەڭدەرىن قايتا جاڭعىرتۋ ءۇشىن، كەڭىنەن ناسيحاتتاۋ ءۇشىن رەسپۋبليكالىق كونكۋرس وتكىزدى. ۇيىمداستىرۋشىلاردىڭ ءبىرى، كومپوزيتور باعلان وماروۆتان ەرتەرەكتە سۇحبات العانىمىزدا، 40-50 ادام قاتىساتىندىعىن جەتكىزگەن بولاتىن. الايدا بۇگىنگى بايقاۋدا ەلىمىزدىڭ تۇكپىر-تۇكپىرىنەن كەلگەن قاتىسۋشىلاردىڭ جالپى سانى 80-گە جەتكەن.

قاتىسۋعا ءوتىنىش بىلدىرگەندەردىڭ بارلىعىن (15-35 جاس ارالىعىنداعىلاردى) تىركەپ، ساحناعا شىعاتىن رەتتىك نومىرلەرى انىقتالعان. بايقاۋ شارتى بويىنشا، ونەرىن كورسەتۋگە كەلگەن ءار ادام  ەكى اننەن ورىندادى. ءبىرى ەسەنقۇل جاقىپبەكتىڭ سوزىنە جازىلعان اندەر بولسا، ەكىنشىسى قاتىسۋشىنىڭ ءوزى تاڭداعان ءان.

بايقاۋداعى قازىلار قۇرامىندا قر مادەنيەت سالاسىنىڭ ۇزدىگى، كومپوزيتور باعلان وماروۆ، قازاقستان جازۋشىلار وداعى باسقارما توراعاسىنىڭ ورىنباسارى ج. ءاشىمجان، قازاق ادەبيەتى گازەتىنىڭ باس رەداكتورى ج.شاشتايۇلى، قاراساي اۋدانى مادەنيەت جانە تىلدەردى دامىتۋ ءبولىمىنىڭ باسشىسى ە.و.جۇماتاەۆ، اقىن، كومپوزيتور، پروديۋسەر ب.ەسەباەۆ، قر مادەنيەت سالاسىنىڭ ۇزدىگى، ءانشى س. مەدەۋوۆ بار.

ءازىمحان نازەركە، قاتىسۋشى: «جامبىل وبلىسى، تالاس اۋدانى، ويىق اۋلىنان كەلىپ وتىرمىن. سايىستارعا كوپ قاتىسا بەرمەيتىنمىن. ءبىر گرۋپپالاسىم وسىنداي سايىستىڭ بولاتىنىن ايتىپ، باعىمدى سىناپ كورۋىمە كەڭەس بەردى. بىردەن ۇيىمداستىرۋ كوميتەتىنە حابارلاسىپ ءوتىنىش ءبىلدىردىم. باسقا قالادا بولعاندىقتان رەسمي تۇردە بۇگىن تاڭەرتەڭ تىركەلىپ وتىرمىن. رەتتىك ءنومىرىم – 69. ءبىرىنشى ءانىم ەسەنقۇل جاقىپبەكتىڭ «الداي-اۋ» دەگەن ءانى، ەكىنشىسى حالىق ءانى  «دۇنيە-اي».

تۇرعانالى شاراپ، قاتىسۋشى: «ءوزىم قىزىلوردانىڭ، جاڭاقورعان دەگەن قالاسىنىڭ تۋماسىمىن. بىلتىر ت.جۇرگەنەۆ اتىنداعى قازاق ۇلتتىق ونەر اكادەمياسىن ءبىتىردىم. رەتتىك ءنومىرىم – 40. ورىنداعان ءبىرىنشى ءانىم «ءوزىڭدى اڭساپ»، ال ەكىنشىسى  كەڭەس دۇيسەكەەۆتىڭ ءانى «ارالىم-ارمانىم». كەي ادامدار كوپ كورەرمەن الدىندا ساسقالاقتاپ جاتادى، ال ماعان سولاي ۇنايدى. ويلاڭىزشى. سەنىڭ دوستارىڭ ءبىر توبە، ودان بولەك ساعان نازار سالىپ وتىرعان كورەرمەن وتىرسا، قانداي كەرەمەت، ءتىپتى ساحنادان كەتكىڭ كەلمەيدى. وسى جولى سول كورەرمەننىڭ ازدىعىنا نالىدىم. دەسە دە وزىمە بەرىلگەن تاپسىرمانى ويداعىداي الىپ شىقتىم دەپ ويلايمىن».

التىنگۇل باقىتحان، قاتىسۋشى: «پاۆلودار وبلىسى، ەكىباستۇز قالاسىنان كەلدىم. اتالمىش كونكۋرسقا قاتىسۋ تۋرالى ۇسىنىس تۇسكەننەن كەيىن، ارنايى دايىندالدىق. ءبىرىنشى ءاندى «مۇزارت-life» جوباسىنىڭ قاتىسۋشىسى ەركەبۇلان امانتاي ەكەۋمىز ەسەنقۇل اعامىزدىڭ سوزىنە جازىلعان، ياسيرا زاحانقىزىنىڭ «تاۋ قىزىنا» دەگەن ءانىن دۋەتپەن ايتتىق. ال كەلەسى ورىنداعانىم «تۋعان ەل»   پاتريوتتىق ءانى. سوناي جاقتان كەلگەسىن، ەڭبەگىڭنىڭ ەش كەتكەنىن قالامايسىڭ عوي. بارىمدى سالدىم. ەندىگى جاۋابىن كۇتۋ عانا قالدى».

جاناربەك ءاشىمجان، قازاقستان جازۋشىلار وداعى باسقارما توراعاسىنىڭ ورىنباسارى: «ەساعاڭنىڭ دۇنيەدەن وتكەنىنە از عانا ۋاقىت بولدى. بىزدە قانشاما ىزدەۋسىز-سۇراۋسىز قالعان تاريحي تۇلعالار بار. ونىڭ جانىندا، وسىنداي شارانى ۇيىمداستىرىپ، رەسپۋبليكالىق بايقاۋ جاريالاۋ – اقىننىڭ شىعارماشىلىعىنىڭ  ونەر سۇيەر، جىر سۇيەر قازاقتىڭ اراسىندا ودان ءارى كەڭىنەن ناسيحاتتالۋىنا ىقپال جاساۋ دەگەن ءسوز. بۇگىن قاتىسىپ وتىرعان 80 ادام، ارقايسى ەكى اننەن ايتاتىنىن ەسكەرسەك، 160 ءان تىڭدادىق. ەسەنقۇل اقىننىڭ ساحنادا ورىندالىپ جۇرگەن 15 شاقتى عانا ءانى بار. سونى اينالدىرىپ ورىنداپ جاتقاندىقتان، بالكىم، كوپ قاتىسۋشىلاردىڭ دەڭگەيى جەتپەي قالىپ جاتتى. دەگەنمەن،  «جاڭا ءان» دەگەن نوميناتسيا بويىنشا بەرىلەتىن سىيلىق بار. سونىڭ ءوزى جاستاردىڭ اراسىندا ءبىر ستيمۋل تۋدىرادى دەپ ويلايمىن».

ايتا كەتەيىك، ەسەنقۇل جاقىپبەكتىڭ سوزىنە جازىلعان اندەر بايقاۋىنىڭ وتكىزىلۋىنە قارجىلاي كومەك كورسەتىپ، سپونسورلىق ەتىپ وتىرعان الماتى وبلىسى، قاراساي اۋدانىنىڭ اكىمى – ماحاببات بيگەلديەۆ. ەرتەرەكتە مالىمدەگەنىمىزدەي، كونكۋرس قاتىسۋشىلارىنا بەرىلەتىن  قارجىلاي سىيلىق: ءۇشىنشى ورىنعا 100 مىڭ، ەكىنشى ورىنعا 150 مىڭ، ءبىرىنشى ورىنعا 300 مىڭ جانە باس جۇلدەگە 500 مىڭ. ودان بولەك ءاربىر قاتىسۋشىلارعا ەسەنقۇل جاقىپبەكتىڭ تاڭدامالى ولەڭدەر جيناعى بەرىلەدى.

ەرتەڭ، 24 اقپان كۇنى، ساعات 15:00-دە گالا-كونتسەرت. بۇگىنگى ىرىكتەۋدە ەڭ ۇزدىك ونەر كورسەتكەن 4-5 قاتىسۋشى جانە  بەكجان تۇرىس، سايات مەدەۋوۆ، دوسىمجان تاڭاتاروۆ، باعلان ءابدرايىموۆ، اسەت ەسجان، قانات ۇمبەتوۆ پەن ءاليا ابىكەن، ت.ب. ونەر يەلەرى قاتىسادى.

وتەتىن ورنى: قاراساي اۋدانى، قاسكەلەڭ «مادەنيەت ءۇيى».

«The Qazaq Times»