Jıl qorıtındısı: İşki sayasattağı eleuli oqiğalar.

2018 jılı Qazaqstannıñ işki sayasatında anau aytqanday jañalıq bolmağanı aytpasa da tüsinikti. Dese de, bügin biz halıq arasında qızu talqılanğan, älsiz bolsa da azamattıq qoğam öziniñ ünin qosıp, «qatıp qalğan» jüyeni özgertuge tırısqan oqiğalarğa qısqaşa toqtaludı jön kördik.

Birinşi kezekte işki sayasatta jıldıñ bastı jañalığı bolğan ol – «QR Qauipsizdik keñesi jöninde» qabıldanğan zañ jobası. Prezident Nazarbaevtıñ Qauipsizdik Keñesin ömir boyı basqaruı öz kezeginde Aqordanıñ bilik tranzitine dayındaluı ğana emes, onı barınşa qauipsiz äri jeñil ötkizudiñ alğı şarttarın aldın ala jasap jatqanın körsetti. Jaña zañ boyınşa, Qauipsizdik keñesiniñ röli artıp, özge bilik tarmaqtarımen salıstırğanda joğarı märtebege ie boldı.

Bwdan bölek sayasat alañında  bolğan jıl jañalıqtarınıñ biri eski jäne jaña sayasatkerlerden qwralğan «Jaña Qazaqstan» forumınıñ qwrıluı. Sayasi ömiri wzaq jıldar boyı bir qalıpta ötip jatqan Qazaqstan üşin bwl aytarlıqtay jağalıq boldı. Jaña sayasi küştiñ Bryussel'degi alğaşqı otırısına eks-prem'er Äkejan Qajıgeldinniñ qatısuı halıq qızığuşılığın tipten arttırdı. Biraq keyinnen forum jwmısı sayabırsıp, «Jaña Qazaqstan» belsendiligi bayauladı.

Sayasat alañında eldiñ nazarın özine audartqan tağı bir oqiğa Qasım-Jomart Toqaevtıñ VVS telearnasına bergen swhbatı. Onda ol «Nwrswltan Nazarbaev 2020 jılı ötetin prezident saylauına qatıspauı mümkin» - degen pikir bildirgen. Biraq keyinnen ol öziniñ bwl pikirin BAQ ökilderi basqaşa tüsingenin aytıp aqtalğan. Dese de, Toqaevtıñ bwl swhbatı «jıl intrigası» atağına layıqtı.

Qazaqstanda biıl sayasi oqiğalardan qarağanda azamattıq qoğam belsendiligi köp boldı. Oğan dälel «Sayragül Sautbay isi» men «Denis Tenniñ qazası».  Eki oqiğada da halıq öziniñ belgili bir jağdaylarda küş bolıp birige alatının körsetti. Bilik belgili bir därejede halıqpen sanasuğa mäjbür boldı. Denis Tenniñ öliminen keyin işki ister ministri otstavkağa ketpese de, bilik qwqıq qorğau organdarına tübegeyli reforma qajet ekendigin moyndadı.

Qısqaşa alğanda 2018 jılı Qazaqstanda bolğan oqiğalar tizbegi osınday. Alda kele jatqan doñız jılında elimizde qanday sayasi oqiğalar bolatının boljap aytu qiın. Dese de, sarapşılar men jurnalister boljamına senetin bolsaq, aldağı jılı merziminen bwrın prezident saylauı ötui mümkin...

"The Qazaq Times"