جىل قورىتىندىسى: ىشكى ساياساتتاعى ەلەۋلى وقيعالار.

2018 جىلى قازاقستاننىڭ ىشكى ساياساتىندا اناۋ ايتقانداي جاڭالىق بولماعانى ايتپاسا دا تۇسىنىكتى. دەسە دە، بۇگىن ءبىز حالىق اراسىندا قىزۋ تالقىلانعان، ءالسىز بولسا دا ازاماتتىق قوعام ءوزىنىڭ ءۇنىن قوسىپ، «قاتىپ قالعان» جۇيەنى وزگەرتۋگە تىرىسقان وقيعالارعا قىسقاشا توقتالۋدى ءجون كوردىك.

ءبىرىنشى كەزەكتە ىشكى ساياساتتا جىلدىڭ باستى جاڭالىعى بولعان ول – «قر قاۋىپسىزدىك كەڭەسى جونىندە» قابىلدانعان زاڭ جوباسى. پرەزيدەنت نازارباەۆتىڭ قاۋىپسىزدىك كەڭەسىن ءومىر بويى باسقارۋى ءوز كەزەگىندە اقوردانىڭ بيلىك ترانزيتىنە دايىندالۋى عانا ەمەس، ونى بارىنشا قاۋىپسىز ءارى جەڭىل وتكىزۋدىڭ العى شارتتارىن الدىن الا جاساپ جاتقانىن كورسەتتى. جاڭا زاڭ بويىنشا، قاۋىپسىزدىك كەڭەسىنىڭ ءرولى ارتىپ، وزگە بيلىك تارماقتارىمەن سالىستىرعاندا جوعارى مارتەبەگە يە بولدى.

بۇدان بولەك ساياسات الاڭىندا  بولعان جىل جاڭالىقتارىنىڭ ءبىرى ەسكى جانە جاڭا ساياساتكەرلەردەن قۇرالعان «جاڭا قازاقستان» فورۋمىنىڭ قۇرىلۋى. ساياسي ءومىرى ۇزاق جىلدار بويى ءبىر قالىپتا ءوتىپ جاتقان قازاقستان ءۇشىن بۇل ايتارلىقتاي جاعالىق بولدى. جاڭا ساياسي كۇشتىڭ بريۋسسەلدەگى العاشقى وتىرىسىنا ەكس-پرەمەر اكەجان قاجىگەلديننىڭ قاتىسۋى حالىق قىزىعۋشىلىعىن تىپتەن ارتتىردى. بىراق كەيىننەن فورۋم جۇمىسى سايابىرسىپ، «جاڭا قازاقستان» بەلسەندىلىگى باياۋلادى.

ساياسات الاڭىندا ەلدىڭ نازارىن وزىنە اۋدارتقان تاعى ءبىر وقيعا قاسىم-جومارت توقاەۆتىڭ ۆۆس تەلەارناسىنا بەرگەن سۇحباتى. وندا ول «نۇرسۇلتان نازارباەۆ 2020 جىلى وتەتىن پرەزيدەنت سايلاۋىنا قاتىسپاۋى مۇمكىن» - دەگەن پىكىر بىلدىرگەن. بىراق كەيىننەن ول ءوزىنىڭ بۇل پىكىرىن باق وكىلدەرى باسقاشا تۇسىنگەنىن ايتىپ اقتالعان. دەسە دە، توقاەۆتىڭ بۇل سۇحباتى «جىل ينتريگاسى» اتاعىنا لايىقتى.

قازاقستاندا بيىل ساياسي وقيعالاردان قاراعاندا ازاماتتىق قوعام بەلسەندىلىگى كوپ بولدى. وعان دالەل «سايراگۇل ساۋتباي ءىسى» مەن «دەنيس تەننىڭ قازاسى».  ەكى وقيعادا دا حالىق ءوزىنىڭ بەلگىلى ءبىر جاعدايلاردا كۇش بولىپ بىرىگە الاتىنىن كورسەتتى. بيلىك بەلگىلى ءبىر دارەجەدە حالىقپەن ساناسۋعا ءماجبۇر بولدى. دەنيس تەننىڭ ولىمىنەن كەيىن ىشكى ىستەر ءمينيسترى وتستاۆكاعا كەتپەسە دە، بيلىك قۇقىق قورعاۋ ورگاندارىنا تۇبەگەيلى رەفورما قاجەت ەكەندىگىن مويندادى.

قىسقاشا العاندا 2018 جىلى قازاقستاندا بولعان وقيعالار تىزبەگى وسىنداي. الدا كەلە جاتقان دوڭىز جىلىندا ەلىمىزدە قانداي ساياسي وقيعالار بولاتىنىن بولجاپ ايتۋ قيىن. دەسە دە، ساراپشىلار مەن جۋرناليستەر بولجامىنا سەنەتىن بولساق، الداعى جىلى مەرزىمىنەن بۇرىن پرەزيدەنت سايلاۋى ءوتۋى مۇمكىن...

"The Qazaq Times"