Aqın Swrağan Rahmetwlınıñ şığarmaşılıq keşi ötti. Foto: Ädebiet portalı.

Keşe Arqa törindegi Elordada aqın, jazuşı, tarihşı Swrağan Rahmetwlınıñ «Jan ğwmırım – Rauşan» attı şığarmaşılıq keşi ötti. Altay men Atıraudıñ, Arqa men Alataudıñ arasındağı Alaştıñ közqaraqtı jaqsısı men jaysañı jinalğan keş aqınnıñ 60 jas mereytoyına arnalğan, äri bwl keştiñ ötuine Qazaqstan Jazuşılar odağı mwrındıq bolıp otır.  

Dara qalam izin salğan aqınnıñ merey toyına arnalğan jır keşin Qazaqstan Jazuşılar odağın Astanadağı filialınıñ direktorı, aqın Däuletkerey Käpwlı jürgizdi jäne keş iesine arnau jırımen şaşuın şaştı. Sonday-aq, öleñ süygen qauımğa atı ketken aqın inilerinen Iqılas Ojay, Wlarbek Nwrğalım, Erbol Beyilhan, Almas Temirbay, Talapbek Tınısbek, Merey Qart, Miras Asan qatarlılar keş iesiniñ öleñderin oqıdı.

Qazaq jeriniñ tükpir-tükpirinen jaqsı men jaysañ jinalıp, keş mereyin asırdı. Foto: Ädebiet portalı.

QR mädeniet jäne sport ministri Arıstanbek Mwhamediwlınıñ Swrağan Rahmetwlına joldağan qwttıqtau hatın ministrdiñ keñesşisi, aqın Bauırjan Qaraqızwlı oqıp berdi jäne aqınıñ iığına şapan japtı. Änşi Merueş Başayqızı Swrağan Rahmetwlınıñ sözine jazılğan «Ana» äninmen, Qayrat Aytpay küyimen şaşu şaştı. Qazaqtıñ süyikti änşisi Nwrlan Önerbaev ta keşke arnayı änşaşumen kelgen bolsa, Svetqali Nwrjanov, Erbolat Bayatwlı qatarlı keş iesiniñ qalamdas dos-ağa, bauırları aq lebizin aqtarıp, keş mereyin asıra tüsti.

Qazaq ädebietinde sonı iz salğan tereñ oylı aqın 60 jasına deyin oqırmanına «Jwldızdıñ lağıl elesi», «Aq tegerşik», «Ören jüyriktiñ silekeyi», «Tüske oranğan küz», «Kögildir şabıt» attı jır jinaqtarın wsınğan. Sonımen birge, «Qalamwş älem» attı zertteu eñbegin, «XX ğasır. Ospan-Çoybalsan» attı tarihi-derekti zertteu eñbekterimen de qazaq ruhaniyatın bayıtqan. Bwdan da bölek köptegen tarihi-ädebi monografiyalıq eñbekterdiñ avtorı.

Swrağan Rahmetwlı, sonday-aq, Qazaqstan jäne Moñğoliya jazuşılar odağınıñ müşesi, Moñğoliyanıñ mädenietine eñbek siñirgen qayratker.

Qazaq ruhaniyatına özindik zor ülesin qosqan Swrağan Rahmetwlınıñ 60 jas merey toyına redakciyamızdıñ atınan qwttı bolsın aytamız! Aldağı biik belesterine talmay jeter qayrat, wzaq ğwmır tileymiz!

“The Qazaq Times”