«جان عۇمىرىم – راۋشان»: ارقادا اقىن سۇراعاننىڭ جىر كەشى ءوتتى

كەشە ارقا تورىندەگى ەلوردادا اقىن، جازۋشى، تاريحشى سۇراعان راحمەتۇلىنىڭ «جان عۇمىرىم – راۋشان» اتتى شىعارماشىلىق كەشى ءوتتى. التاي مەن اتىراۋدىڭ، ارقا مەن الاتاۋدىڭ اراسىنداعى الاشتىڭ كوزقاراقتى جاقسىسى مەن جايساڭى جينالعان كەش اقىننىڭ 60 جاس مەرەيتويىنا ارنالعان، ءارى بۇل كەشتىڭ وتۋىنە قازاقستان جازۋشىلار وداعى مۇرىندىق بولىپ وتىر.  

دارا قالام ءىزىن سالعان اقىننىڭ مەرەي تويىنا ارنالعان جىر كەشىن قازاقستان جازۋشىلار وداعىن استاناداعى فيليالىنىڭ ديرەكتورى، اقىن داۋلەتكەرەي كاپۇلى جۇرگىزدى جانە كەش يەسىنە ارناۋ جىرىمەن شاشۋىن شاشتى. سونداي-اق، ولەڭ سۇيگەن قاۋىمعا اتى كەتكەن اقىن ىنىلەرىنەن ىقىلاس وجاي، ۇلاربەك نۇرعالىم، ەربول بەيىلحان، الماس تەمىرباي، تالاپبەك تىنىسبەك، مەرەي قارت، ميراس اسان قاتارلىلار كەش يەسىنىڭ ولەڭدەرىن وقىدى.

قازاق جەرىنىڭ تۇكپىر-تۇكپىرىنەن جاقسى مەن جايساڭ جينالىپ، كەش مەرەيىن اسىردى. فوتو: ادەبيەت پورتالى.

قر مادەنيەت جانە سپورت ءمينيسترى ارىستانبەك مۇحامەديۇلىنىڭ سۇراعان راحمەتۇلىنا جولداعان قۇتتىقتاۋ حاتىن ءمينيستردىڭ كەڭەسشىسى، اقىن باۋىرجان قاراقىزۇلى وقىپ بەردى جانە اقىنىڭ يىعىنا شاپان جاپتى. ءانشى مەرۋەش باشايقىزى سۇراعان راحمەتۇلىنىڭ سوزىنە جازىلعان «انا» انىنمەن، قايرات ايتپاي كۇيىمەن شاشۋ شاشتى. قازاقتىڭ سۇيىكتى ءانشىسى نۇرلان ونەرباەۆ تا كەشكە ارنايى انشاشۋمەن كەلگەن بولسا، سۆەتقالي نۇرجانوۆ، ەربولات باياتۇلى قاتارلى كەش يەسىنىڭ قالامداس دوس-اعا، باۋىرلارى اق لەبىزىن اقتارىپ، كەش مەرەيىن اسىرا ءتۇستى.

قازاق ادەبيەتىندە سونى ءىز سالعان تەرەڭ ويلى اقىن 60 جاسىنا دەيىن وقىرمانىنا «جۇلدىزدىڭ لاعىل ەلەسى»، «اق تەگەرشىك»، «ورەن جۇيرىكتىڭ سىلەكەيى»، «تۇسكە ورانعان كۇز»، «كوگىلدىر شابىت» اتتى جىر جيناقتارىن ۇسىنعان. سونىمەن بىرگە، «قالامۇش الەم» اتتى زەرتتەۋ ەڭبەگىن، «XX عاسىر. وسپان-چويبالسان» اتتى تاريحي-دەرەكتى زەرتتەۋ ەڭبەكتەرىمەن دە قازاق رۋحانياتىن بايىتقان. بۇدان دا بولەك كوپتەگەن تاريحي-ادەبي مونوگرافيالىق ەڭبەكتەردىڭ اۆتورى.

سۇراعان راحمەتۇلى، سونداي-اق، قازاقستان جانە موڭعوليا جازۋشىلار وداعىنىڭ مۇشەسى، موڭعوليانىڭ مادەنيەتىنە ەڭبەك سىڭىرگەن قايراتكەر.

قازاق رۋحانياتىنا وزىندىك زور ۇلەسىن قوسقان سۇراعان راحمەتۇلىنىڭ 60 جاس مەرەي تويىنا رەداكتسيامىزدىڭ اتىنان قۇتتى بولسىن ايتامىز! الداعى بيىك بەلەستەرىنە تالماي جەتەر قايرات، ۇزاق عۇمىر تىلەيمىز!

“The Qazaq Times”