Keşe memleket basşısı N.Nazarbaev Aqtöbe oblısınıñ äkimi Berdibek Saparbaevtı qabıldadı. Kezdesu barısında Qazaqstan Prezidentine 2016 jıldıñ qorıtındısı boyınşa Aqtöbe oblısınıñ äleumettik-ekonomikalıq damuı jöninde bayandaldı.Bwl turalı Aqordanıñ resmi saytı jazdı.

Elbası Aqtöbe oblısı perspektivalı önerkäsiptik öñir bolıp sanalatının, degenmen elimizdiñ işki jalpı önimine qosatın oblıstıñ ekonomikalıq ülesi jıldan jılğa azayıp kele jatqanın ayttı.

– Mwnday ürdis 2012 jıldan beri jalğasuda. Biz onıñ sebepterin anıqtap, tiisti şaralar qabıldauımız kerek. Eger de auıl şaruaşılığı eksportın arttıramız desek, qayta öñdeu öndirisi nısandarın damıtuğa män beru qajet, – dedi Nwrswltan Nazarbaev.

Memleket basşısı şağın jäne orta biznesti damıtıp, onıñ öñir ekonomikasındağı ülesin 50%-ğa jetkizudiñ mañızdılığına nazar audardı.

Sonday-aq, Qazaqstan Prezidenti oblıstıñ äleumettik saladağı jwmısınıñ basımdığı bar bağıttarın belgilep berdi. Sonıñ qatarında balabaqşa sanın köbeytu, apattı jağdayda twrğan mektepterge jöndeu jwmıstarın jürgizu, bwğan qosa birqatar bilim beru mekemelerindegi üşinşi auısımdı joyu mäseleleri bar.

Aqtöbe oblısınıñ äkimi öñirdiñ ekonomikalıq jağdayın jaqsartu, sonıñ işinde önerkäsip sektorın damıtu, auıl şaruaşılığına investiciya tartu jäne halıqtı jwmıspen qamtu maqsatımen jürgizilgen jwmıstar turalı aytıp berdi.

– Jıl qorıtındısı boyınşa oblıstıñ äleumettik-ekonomikalıq damuınıñ negizgi körsetkişteri öskeni bayqaladı. Eñ bastısı – jwmıssızdıqtıñ köbeyuine jol bergen joqpız. Memlekettik bağdarlamalardıñ der kezinde jüzege asırıluı nätijesinde bıltır 16 mıñ jaña jwmıs ornı aşıldı, – dedi B.Saparbaev.

Kezdesu soñında Elbası birqatar naqtı tapsırma berdi.

«The Qazaq Times»