فوتو: akorda.kz

كەشە مەملەكەت باسشىسى ن.نازارباەۆ اقتوبە وبلىسىنىڭ اكىمى بەردىبەك ساپارباەۆتى قابىلدادى. كەزدەسۋ بارىسىندا قازاقستان پرەزيدەنتىنە 2016 جىلدىڭ قورىتىندىسى بويىنشا اقتوبە وبلىسىنىڭ الەۋمەتتىك-ەكونوميكالىق دامۋى جونىندە باياندالدى.بۇل تۋرالى اقوردانىڭ رەسمي سايتى جازدى.

ەلباسى اقتوبە وبلىسى پەرسپەكتيۆالى ونەركاسىپتىك ءوڭىر بولىپ سانالاتىنىن، دەگەنمەن ەلىمىزدىڭ ىشكى جالپى ونىمىنە قوساتىن وبلىستىڭ ەكونوميكالىق ۇلەسى جىلدان جىلعا ازايىپ كەلە جاتقانىن ايتتى.

– مۇنداي ءۇردىس 2012 جىلدان بەرى جالعاسۋدا. ءبىز ونىڭ سەبەپتەرىن انىقتاپ، ءتيىستى شارالار قابىلداۋىمىز كەرەك. ەگەر دە اۋىل شارۋاشىلىعى ەكسپورتىن ارتتىرامىز دەسەك، قايتا وڭدەۋ ءوندىرىسى نىساندارىن دامىتۋعا ءمان بەرۋ قاجەت، – دەدى نۇرسۇلتان نازارباەۆ.

مەملەكەت باسشىسى شاعىن جانە ورتا بيزنەستى دامىتىپ، ونىڭ ءوڭىر ەكونوميكاسىنداعى ۇلەسىن 50%-عا جەتكىزۋدىڭ ماڭىزدىلىعىنا نازار اۋداردى.

سونداي-اق، قازاقستان پرەزيدەنتى وبلىستىڭ الەۋمەتتىك سالاداعى جۇمىسىنىڭ باسىمدىعى بار باعىتتارىن بەلگىلەپ بەردى. سونىڭ قاتارىندا بالاباقشا سانىن كوبەيتۋ، اپاتتى جاعدايدا تۇرعان مەكتەپتەرگە جوندەۋ جۇمىستارىن جۇرگىزۋ، بۇعان قوسا بىرقاتار ءبىلىم بەرۋ مەكەمەلەرىندەگى ءۇشىنشى اۋىسىمدى جويۋ ماسەلەلەرى بار.

اقتوبە وبلىسىنىڭ اكىمى ءوڭىردىڭ ەكونوميكالىق جاعدايىن جاقسارتۋ، سونىڭ ىشىندە ونەركاسىپ سەكتورىن دامىتۋ، اۋىل شارۋاشىلىعىنا ينۆەستيتسيا تارتۋ جانە حالىقتى جۇمىسپەن قامتۋ ماقساتىمەن جۇرگىزىلگەن جۇمىستار تۋرالى ايتىپ بەردى.

– جىل قورىتىندىسى بويىنشا وبلىستىڭ الەۋمەتتىك-ەكونوميكالىق دامۋىنىڭ نەگىزگى كورسەتكىشتەرى وسكەنى بايقالادى. ەڭ باستىسى – جۇمىسسىزدىقتىڭ كوبەيۋىنە جول بەرگەن جوقپىز. مەملەكەتتىك باعدارلامالاردىڭ دەر كەزىندە جۇزەگە اسىرىلۋى ناتيجەسىندە بىلتىر 16 مىڭ جاڭا جۇمىس ورنى اشىلدى، – دەدى ب.ساپارباەۆ.

كەزدەسۋ سوڭىندا ەلباسى بىرقاتار ناقتى تاپسىرما بەردى.

«The Qazaq Times»