Mänerlep sırğanauşı Denis Tenniñ qayğılı qazasınan keyin Qazaqstan jwrtşılığı işki ister ministrligin jerden alıp, jerge saluda. Biri elimizdiñ bastı policeyi «Qalmwhanbet Qasımovtı ornınan alıp tastau kerek» dese, endi biri «İİM tolıqtay reforma qajet» deydi. Osığan baylanıstı bügin biz «bilik halıq talabın orınday ala ma jäne odan policiya jwmısı qanşalıqtı özgeredi?» degen swraqqa jauap izdep körudi jön kördik.

Jalpı, Denis Tenniñ qazasına deyin de qazaq qoğamı policiya qızmetkerlerine senuden qalğan. Osıdan biraz uaqıt bwrın «Ortalıq Aziyadağı demokratiyanı damıtu» qorı İİM jwmısına qatıstı äleumettik zertteu jürgizgen. Zertteu qorıtındısı boyınşa, Qazaqstan halqınıñ 63 payızı policiya qızmetkerlerine senbeytindigin aytqan. Senu bılay twrsın. Qazir el arasında policiya qızmetkerlerine degen öşpendilik kün sanap artıp keledi. Bwl öşpendilik auıq-auıq köpşilik nazarına iligip te jatır. Osıdan twp-tura bir jıl bwrın Almatı qalasında policiyağa öştesken Ruslan Külekbaev degen azamat segiz birdey tärtip saqşısın öltirgen. Osı kezde azamattıq belsendiler men sayasatkerler «bizdiñ policiyağa tübegeyli reforma qajet» degen pikirler aytqan. Biraq İİM segiz adamnıñ ömirin qiğan qandı qırğınan eşqanday sabaq almağanın biıl tağı däleldedi.

Denis Tenniñ qayğılı qazası işki ister ministrliginiñ irip-şirigen organ ekendigin «tayğa tañba basqanday» etip körsetti. Bwl jerde jeti jıl bir ornında tabjılmay otırğan Qalmwhanbet Qasımovtıñ otstavkağa ketui mäseleni şeşpeytindigi aytpasa da tüsinikti jayt. Sebebi işki ister ministrligindegi barlıq mäsele Jañaözen halqın «tağı şıqsa tağı atamız» degen  ministrge baylanıp twrğan joq. Bwl jerde işki ister ministrligine Gruziyadağıday tolıqqandı reforma qajet. Biraq Gruziyada jalğız ministrlikke ğana emes, twtastay bilik jüyesine reforma jasalğanın ayta ketken jön. Däl qazirgi jağdayda eger bilik qoğam talabın orındap, Qasımovtı qızmetinen bosatıp, aldağı uaqıtta İİM reforma jasağan künniñ özinde bwl halıq narazılığın uaqıtşa basu bolıp şığadı. YAğni toğız, on, jiırma nemese otız jıl otırğan kreslodan ayırılıp qalmaudıñ qamı.

“The Qazaq Times”