مانەرلەپ سىرعاناۋشى دەنيس تەننىڭ قايعىلى قازاسىنان كەيىن قازاقستان جۇرتشىلىعى ىشكى ىستەر مينيسترلىگىن جەردەن الىپ، جەرگە سالۋدا. ءبىرى ەلىمىزدىڭ باستى پوليتسەيى «قالمۇحانبەت قاسىموۆتى ورنىنان الىپ تاستاۋ كەرەك» دەسە، ەندى ءبىرى «ءىىم تولىقتاي رەفورما قاجەت» دەيدى. وسىعان بايلانىستى بۇگىن ءبىز «بيلىك حالىق تالابىن ورىنداي الا ما جانە ودان پوليتسيا جۇمىسى قانشالىقتى وزگەرەدى؟» دەگەن سۇراققا جاۋاپ ىزدەپ كورۋدى ءجون كوردىك.

جالپى، دەنيس تەننىڭ قازاسىنا دەيىن دە قازاق قوعامى پوليتسيا قىزمەتكەرلەرىنە سەنۋدەن قالعان. وسىدان ءبىراز ۋاقىت بۇرىن «ورتالىق ازياداعى دەموكراتيانى دامىتۋ» قورى ءىىم جۇمىسىنا قاتىستى الەۋمەتتىك زەرتتەۋ جۇرگىزگەن. زەرتتەۋ قورىتىندىسى بويىنشا، قازاقستان حالقىنىڭ 63 پايىزى پوليتسيا قىزمەتكەرلەرىنە سەنبەيتىندىگىن ايتقان. سەنۋ بىلاي تۇرسىن. قازىر ەل اراسىندا پوليتسيا قىزمەتكەرلەرىنە دەگەن وشپەندىلىك كۇن ساناپ ارتىپ كەلەدى. بۇل وشپەندىلىك اۋىق-اۋىق كوپشىلىك نازارىنا ىلىگىپ تە جاتىر. وسىدان تۇپ-تۋرا ءبىر جىل بۇرىن الماتى قالاسىندا پوليتسياعا وشتەسكەن رۋسلان كۇلەكباەۆ دەگەن ازامات سەگىز بىردەي ءتارتىپ ساقشىسىن ولتىرگەن. وسى كەزدە ازاماتتىق بەلسەندىلەر مەن ساياساتكەرلەر «ءبىزدىڭ پوليتسياعا تۇبەگەيلى رەفورما قاجەت» دەگەن پىكىرلەر ايتقان. بىراق ءىىم سەگىز ادامنىڭ ءومىرىن قيعان قاندى قىرعىنان ەشقانداي ساباق الماعانىن بيىل تاعى دالەلدەدى.

دەنيس تەننىڭ قايعىلى قازاسى ىشكى ىستەر مينيسترلىگىنىڭ ءىرىپ-شىرىگەن ورگان ەكەندىگىن «تايعا تاڭبا باسقانداي» ەتىپ كورسەتتى. بۇل جەردە جەتى جىل ءبىر ورنىندا تابجىلماي وتىرعان قالمۇحانبەت قاسىموۆتىڭ وتستاۆكاعا كەتۋى ماسەلەنى شەشپەيتىندىگى ايتپاسا دا تۇسىنىكتى جايت. سەبەبى ىشكى ىستەر مينيسترلىگىندەگى بارلىق ماسەلە جاڭاوزەن حالقىن «تاعى شىقسا تاعى اتامىز» دەگەن  مينيسترگە بايلانىپ تۇرعان جوق. بۇل جەردە ىشكى ىستەر مينيسترلىگىنە گرۋزياداعىداي تولىققاندى رەفورما قاجەت. بىراق گرۋزيادا جالعىز مينيسترلىككە عانا ەمەس، تۇتاستاي بيلىك جۇيەسىنە رەفورما جاسالعانىن ايتا كەتكەن ءجون. ءدال قازىرگى جاعدايدا ەگەر بيلىك قوعام تالابىن ورىنداپ، قاسىموۆتى قىزمەتىنەن بوساتىپ، الداعى ۋاقىتتا ءىىم رەفورما جاساعان كۇننىڭ وزىندە بۇل حالىق نارازىلىعىن ۋاقىتشا باسۋ بولىپ شىعادى. ياعني توعىز، ون، جيىرما نەمەسە وتىز جىل وتىرعان كرەسلودان ايىرىلىپ قالماۋدىڭ قامى.

“The Qazaq Times”