Qazaqstan äriptestik pen ıntımaqtastıqtı keñeytu üşin Euroodaqqa «jol kartasın» äzirleudi wsındı.

Sırtqı ister ministri Qayrat Äbdirahmanov Bryussel' qalasında ötken «Qazaqstan-Euroodaq» keñesiniñ otırısında Euroodaq ökilderine Qazaqstan men Euroodaq arasındağı äriptestik pen ıntımaqtastıqtı keñeytu üşin «jol kartasın» äzirleudi wsınğan. SİM-niñ baspasöz qızmeti taratqan mälimet boyınşa, Europarlament pen Euroodaqqa müşe elderdiñ basım köpşiligi 2015 jılı Qazaqstanmen 29 sala boyınşa äriptestik ornatuğa baylanıstı  qol qoyılğan qwjattı ratifikaciyalağan.

Bwdan bölek Qayrat Äbdirahmanov jiın barısında viza mäselesinde tilge tiek etken. Ol Euroodaq ökilderine sauda-ekonomikalıq baylanıstardı nığaytu azamattardıñ erkin qozğalısın qamtamasız etumen tığız baylanıstı ekendigin aytıp, mümkindiginşe qısqa merzimde vizalıq rejimdi jeñildetu jönindegi kelissözderdi bastaudı wsınğan.

Euroodaq - Qazaqstannıñ iri sauda jäne investiciyalıq äriptesi. 2017 jılı Qazaqstan men EO arasındağı tauar aynalımınıñ kölemi 2016 jılmen salıstırğanda 25% artıp, şamamen 30 mlrd dollardı qwrağan.

“The Qazaq Times”