Aqtöbe oblısında Özbekstan azamattarı mingen avtobus apatqa wşıradı.

Aqpan ayınıñ 25-i küni sağat 20:40 şamasında Samara-Şımkent tas jolınıñ Aqtöbe oblısı, Hromtau audanına qarastı böliginde avtobus apatqa wşırağan. Oblıstıq işki ister departamentiniñ habarlauınşa, Mersedes markalı avtobustı 35 jastağı Oñtüstik Qazaqstan oblısınıñ azamatı jürgizip kele jatqan. Ol Jazıq auılınıñ twsına jete bergende rölge ie bola almay avtobus jırağa tüsip ketken. Saldarınan avtobus salonında bolğan jeti Özbekstan Respublikasınıñ azamatı türli dene jaraqattarın alıp, Hromtau audandıq auruhanasına jetkizilgen. Avto kölik salonında jalpı sanı 25 adam bolğan.

Esteriñizge salayıq, bwğan deyin qañtar ayınıñ 18-i küni Aqtöbe oblısınıñ Irğız audanına qarastı Qalıbay auılı mañında 57 adam mingen avtobus örtenip ketken bolatın. Saldarınan Özbekstan Respublikasınıñ 52 azamatı oqiğa ornında köz jwmıp,  2 jolauşı men 3 jürgizuşi türli dene jaraqattarın alğan.

“The Qazaq Times”