فوتو: ازاتتىق راديوسى.

اقتوبە وبلىسىندا وزبەكستان ازاماتتارى مىنگەن اۆتوبۋس اپاتقا ۇشىرادى.

اقپان ايىنىڭ 25-ءى كۇنى ساعات 20:40 شاماسىندا سامارا-شىمكەنت تاس جولىنىڭ اقتوبە وبلىسى، حرومتاۋ اۋدانىنا قاراستى بولىگىندە اۆتوبۋس اپاتقا ۇشىراعان. وبلىستىق ىشكى ىستەر دەپارتامەنتىنىڭ حابارلاۋىنشا، Merسedes ماركالى اۆتوبۋستى 35 جاستاعى وڭتۇستىك قازاقستان وبلىسىنىڭ ازاماتى جۇرگىزىپ كەلە جاتقان. ول جازىق اۋىلىنىڭ تۇسىنا جەتە بەرگەندە رولگە يە بولا الماي اۆتوبۋس جىراعا ءتۇسىپ كەتكەن. سالدارىنان اۆتوبۋس سالونىندا بولعان جەتى وزبەكستان رەسپۋبليكاسىنىڭ ازاماتى ءتۇرلى دەنە جاراقاتتارىن الىپ، حرومتاۋ اۋداندىق اۋرۋحاناسىنا جەتكىزىلگەن. اۆتو كولىك سالونىندا جالپى سانى 25 ادام بولعان.

ەستەرىڭىزگە سالايىق، بۇعان دەيىن قاڭتار ايىنىڭ 18-ءى كۇنى اقتوبە وبلىسىنىڭ ىرعىز اۋدانىنا قاراستى قالىباي اۋىلى ماڭىندا 57 ادام مىنگەن اۆتوبۋس ورتەنىپ كەتكەن بولاتىن. سالدارىنان وزبەكستان رەسپۋبليكاسىنىڭ 52 ازاماتى وقيعا ورنىندا كوز جۇمىپ،  2 جولاۋشى مەن 3 جۇرگىزۋشى ءتۇرلى دەنە جاراقاتتارىن العان.

“The Qazaq Times”