Foto: en.mediasat.info

Jaqında BAQ betterinde Almatı qalasında wstalğan Qırğızstan Joğarı Keñesiniñ deputatı Dämirbek Asılbekwlınıñ Qazaqstan azamattığın alğandığı jöninde aqparat taradı. Bwl qoğamda qızu talqılanıp, Qırğızstan sırtqı ister ministrligi atalmış jağdayğa baylanıstı tüsinikteme beruden bas tarttı. Osığan oray bügin biz qos azamattıq alğan Qırğızstan sayasatkerleriniñ tizimin jariyalaudı jön kördik.

Dämirbek Asılbekwlınıñ dauına deyin Qazaqstan men Qırğızstan halqınıñ nazarın özine audartqan oppoziciyalıq sayasatker Ömirbek Babanov boldı. Onıñ Qazaqstanğa qatıstı dauı 2007 jılı bastalğan. Däl osı jılı Qırğızstan ortalıq saylau komissiyası Babanovtı «Qazaqstan azamatı» - dep tanıp, saylauğa jibermey qoyğan. Keyinnen Babanovtıñ azamattığı jöninde BAQ ökilderi men sayasatkerler 2010, 2015 jıldarı ötken parlament saylaularında da jarısa jazğan, aytqan, körsetken. Alayda bwnıñ barlığına qaramastan Babanov parlamentke ötip ketken. Tipti biraz uaqıt prem'er-ministr de bolğan. Biraq 2017 jılğı prezident saylauında Qırğızstannıñ atı şulı eks-prezidenti Almazbek Atambaev Ömirbek Babanovtı «Qazaqstannıñ jandayşabı» - dep atap, Nazarbaevpen kezesuin qatañ sınğa alğan.  Osıdan keyin Babanovtıñ Qırğızstan sayasat sahnasındağı röli tämämdalğan. Prezident saylauı ayaqtalğanan keyin ol elden ketuge mäjbür boldı.

Ömirbek Babanov. Foto: 24kg.

Ömirbek Babanovtan keyingi qos azamattıq dauına ilikken tağı bir sayasatker Qırğızstan keden qızmetiniñ basşısı Quanışbek Qwlmatov. 2011 jılı Qırğızstan Bas prokuraturası Qwlmatovtıñ Resey azamattığın alğanın mälimdegen. Osıdan keyin BAQ ökilderi onıñ da ömirbayanın «mayşammen qarağan». Biraq jurnalister qauımı men oppoziciyalıq toptardıñ narazılığına qaramastan osı uaqıtqa deyin ol Bişkek qalasınıñ äkimi, "Resey-Qırğızstan" damu qorınıñ basşısı, Wlttıq bank törağası qızmetterin atqarıp ülgergen. Bir sözben aytqanda ol da qos azamattıqtıñ paydasın körmese, ziyanın körmegen sayasatkerlerdiñ qatarında.

Quanışbek Qwlmatov. Foto: 24kg.

Qırğızstan sayasatkerleriniñ arasında qos azamattıqtıñ kesirinen kreslosınan ayırılğan «Respublika-Ata Jwrt» frakciyasınıñ deputatı Jırğalbek Samatov. 2016 jılı Qırğızstan Bas prokuraturası Resey Federaciyasınıñ köşi-qon qızmetinen alğan qwjattarğa süyenip, onı deputattıq mandatınan ayırğan. Bas prokuratura mälimetinşe, Jırğalbek Smatov 2001 jılı Resey azamattığın alğan. Biraq oğan qaramastan Joğarı Keñeske «Respublika – Ata Jwrt» partiyasınıñ atınan deputat bolıp saylanğan.

Jırğalbek Samatov. Foto: 24kg.

Jalpı alğanda Qırğızstanda joğarıda aytılğan sayasatkerlerden bölek, kimderdiñ qos azamattığı bar ekendigin döp basıp aytu qiın. Sebebi bilik basında jürgen azamattardıñ basım köpşiligi Asqar Aqaev pen Qwrmanbek Bakiev taqtan tayğannan keyin özge eldiñ azamattığın aludı "trendke" aynaldırğan. Biraq bwl Qazaqstan halqın tañ qaldıratın jañalıq emes. Sebebi osıdan birneşe jıl bwrın Austriya türmesinde öz özine qol jwmsap qaytıs bolğan Rahat Älievtiñ de Qazaqstannan bölek Greciya azamattığın alğandığı el esinde.

“The Qazaq Times”