Qazaqstanda wstalğan qırğız deputatınıñ «Qorğas» keden beketine qanday qatısı bar?

Aqpan ayınıñ 16-sı küni BAQ betterinde Qazaqstan aumağında jürgizilgen arnayı operaciya barısında Qırğız Respublikasınıñ 3 birdey azamatınıñ wstalğandığı jöninde aqparat taradı. Qazaqstan qwzırlı organdarı qamauğa alğan Qırğızstan azamattarı kimder? Olar el aumağına qanday maqsatpen kelgen? Qırğız şeneuniginiñ "Qorğas" keden beketine qanday qatısı bar?

Aqpan ayınıñ 15-i men 16-sı künderi aralığında Almatı, Jambıl jäne Oñtüstik Qazaqstan oblıstarında jürgizilgen arnayı operaciya barısında 29 adam wstaldı. Olardıñ 16-sı Almatı jäne Jambıl oblısında, al qalğan 13-i Oñtüstik Qazaqstan oblısında twtqındalğan.  Wstalğandardıñ arasında keden qızmetkerleri, joğarı lauazımdı sayasatkerler, wyımdasqan qılmıstıq top müşelerimen qatar, soñğı uaqıttarı Qazaqstanğa "nota jiberuden jalıqpaytın" Qırğız Respublikasınıñ azamattarı da bar.

Qazaqstan aumağında wstalğan qırğızstandıq üş azamattıñ biri 1981 jılı 3 aqpan küni Qaraköl aumağında düniege kelgen Joğarı Keñes deputatı Dämirbek Asılbekwlı. Ol 2000-2004 jıldarı OsOO «APMS» kompaniyasınıñ direktorı, 2006-2008 jıldarı OsOO «Sky Mobile» kompaniyasınıñ bölim meñgeruşisi, 2008-2009 OsOO «BiMoKom» bas direktorı, 2009-2010 jılardı Qırğızstan Joğarı Keñesiniñ V şaqırılım deputatı, 2010-2015 jıldarı JAQ «Al'fa Telekom» kompaniyasınıñ memlekettik organdarmen qarım-qatınas ornatu jäne müddelerdi qorğau böliminiñ kordinatorı qızmetterin atqarğan. Qazaqstan qwzırlı organdarı qamauğa alğan ekinşi qırğızstandıq el aumağındağı qılmıstıq toptırdıñ biriniñ beldi müşesi 1979 jılı 15 qaraşa küni Narın oblısında düniege kelgen Mwradilov Wlanbek Twratbekwlı. Ol Asılbekwlımen qatar «Al'fa Telekom» kompaniyasınıñ Oş qalası men Oş oblısındağı bölimşesin basqarğan. Qırğızstan BAQ ökilderiniñ mälimetinşe, Mwradilov pen Asılbekwlı 15 aqpan küni Bişkek äuejayınan Almatığa birge attanğan. Al Qazaqstan aumağında wstalğan üşinşi Qırğızstan azamatı 1985 jılı 9 qaraşada Narın qalasında düniege kelgen Abakirov Şıñğıs Abakirwlı. Ol «Aq jol» baqılau beketinen Qazaqstan aumağına 16 aqpan küni sağat 6:42-de ötken. Abakirwlınıñ atına Bişkek qalasında «Sertifikat i Ko» kompaniyası tirkelgen.

Qırğızstan BAQ ökilderiniñ mälimetinşe, Mwradilov, Asılbekwlı jäne Abakirovtıñ «Qorğas» keden beketinen kontrabandalıq jolmen tauar ötkizuge qatısı bar. Olar qazaqstandıq sıbaylastarımen qosılıp Qıtaydan «Qorğas» keden beketi arqılı ötetin tauarlarğa «Qırğızstanğa arnalğan» degen qwjattar jasağan. Biraq şın mäninde ol tauarlar Qırğızstanğa jetpey Qazaqstan aumağında qalıp qoyatın bolğan. Aldın ala boljamdar boyınşa, «qırğızstandıq üştik» «Qorğas» keden beketi arqılı ötetin tauarlarğa arnalğan qwjattardı Şıñğıs Abakirovtıñ «Sertifikat i Ko» kompaniyası arqılı jasağan.

“The Qazaq Times”