قازاقستاندا ۇستالعان قىرعىز دەپۋتاتىنىڭ «قورعاس» كەدەن بەكەتىنە قانداي قاتىسى بار؟

اقپان ايىنىڭ 16-سى كۇنى باق بەتتەرىندە قازاقستان اۋماعىندا جۇرگىزىلگەن ارنايى وپەراتسيا بارىسىندا قىرعىز رەسپۋبليكاسىنىڭ 3 بىردەي ازاماتىنىڭ ۇستالعاندىعى جونىندە اقپارات تارادى. قازاقستان قۇزىرلى ورگاندارى قاماۋعا العان قىرعىزستان ازاماتتارى كىمدەر؟ ولار ەل اۋماعىنا قانداي ماقساتپەن كەلگەن؟ قىرعىز شەنەۋنىگىنىڭ "قورعاس" كەدەن بەكەتىنە قانداي قاتىسى بار؟

اقپان ايىنىڭ 15-ءى مەن 16-سى كۇندەرى ارالىعىندا الماتى، جامبىل جانە وڭتۇستىك قازاقستان وبلىستارىندا جۇرگىزىلگەن ارنايى وپەراتسيا بارىسىندا 29 ادام ۇستالدى. ولاردىڭ 16-سى الماتى جانە جامبىل وبلىسىندا، ال قالعان 13-ءى وڭتۇستىك قازاقستان وبلىسىندا تۇتقىندالعان.  ۇستالعانداردىڭ اراسىندا كەدەن قىزمەتكەرلەرى، جوعارى لاۋازىمدى ساياساتكەرلەر، ۇيىمداسقان قىلمىستىق توپ مۇشەلەرىمەن قاتار، سوڭعى ۋاقىتتارى قازاقستانعا "نوتا جىبەرۋدەن جالىقپايتىن" قىرعىز رەسپۋبليكاسىنىڭ ازاماتتارى دا بار.

قازاقستان اۋماعىندا ۇستالعان قىرعىزستاندىق ءۇش ازاماتتىڭ ءبىرى 1981 جىلى 3 اقپان كۇنى قاراكول اۋماعىندا دۇنيەگە كەلگەن جوعارى كەڭەس دەپۋتاتى دامىربەك اسىلبەكۇلى. ول 2000-2004 جىلدارى وسوو «APMS» كومپانياسىنىڭ ديرەكتورى، 2006-2008 جىلدارى وسوو «Sky Mobile» كومپانياسىنىڭ ءبولىم مەڭگەرۋشىسى، 2008-2009 وسوو «بيموكوم» باس ديرەكتورى، 2009-2010 جىلاردى قىرعىزستان جوعارى كەڭەسىنىڭ V شاقىرىلىم دەپۋتاتى، 2010-2015 جىلدارى جاق «الفا تەلەكوم» كومپانياسىنىڭ مەملەكەتتىك ورگاندارمەن قارىم-قاتىناس ورناتۋ جانە مۇددەلەردى قورعاۋ ءبولىمىنىڭ كورديناتورى قىزمەتتەرىن اتقارعان. قازاقستان قۇزىرلى ورگاندارى قاماۋعا العان ەكىنشى قىرعىزستاندىق ەل اۋماعىنداعى قىلمىستىق توپتىردىڭ ءبىرىنىڭ بەلدى مۇشەسى 1979 جىلى 15 قاراشا كۇنى نارىن وبلىسىندا دۇنيەگە كەلگەن ءمۇرادىلوۆ ۇلانبەك تۇراتبەكۇلى. ول اسىلبەكۇلىمەن قاتار «الفا تەلەكوم» كومپانياسىنىڭ وش قالاسى مەن وش وبلىسىنداعى بولىمشەسىن باسقارعان. قىرعىزستان باق وكىلدەرىنىڭ مالىمەتىنشە، ءمۇرادىلوۆ پەن اسىلبەكۇلى 15 اقپان كۇنى بىشكەك اۋەجايىنان الماتىعا بىرگە اتتانعان. ال قازاقستان اۋماعىندا ۇستالعان ءۇشىنشى قىرعىزستان ازاماتى 1985 جىلى 9 قاراشادا نارىن قالاسىندا دۇنيەگە كەلگەن اباكيروۆ شىڭعىس اباكيرۇلى. ول «اق جول» باقىلاۋ بەكەتىنەن قازاقستان اۋماعىنا 16 اقپان كۇنى ساعات 6:42-دە وتكەن. اباكيرۇلىنىڭ اتىنا بىشكەك قالاسىندا «سەرتيفيكات ي كو» كومپانياسى تىركەلگەن.

قىرعىزستان باق وكىلدەرىنىڭ مالىمەتىنشە، ءمۇرادىلوۆ، اسىلبەكۇلى جانە اباكيروۆتىڭ «قورعاس» كەدەن بەكەتىنەن كونتراباندالىق جولمەن تاۋار وتكىزۋگە قاتىسى بار. ولار قازاقستاندىق سىبايلاستارىمەن قوسىلىپ قىتايدان «قورعاس» كەدەن بەكەتى ارقىلى وتەتىن تاۋارلارعا «قىرعىزستانعا ارنالعان» دەگەن قۇجاتتار جاساعان. بىراق شىن مانىندە ول تاۋارلار قىرعىزستانعا جەتپەي قازاقستان اۋماعىندا قالىپ قوياتىن بولعان. الدىن الا بولجامدار بويىنشا، «قىرعىزستاندىق ۇشتىك» «قورعاس» كەدەن بەكەتى ارقىلى وتەتىن تاۋارلارعا ارنالعان قۇجاتتاردى شىڭعىس اباكيروۆتىڭ «سەرتيفيكات ي كو» كومپانياسى ارقىلى جاساعان.

“The Qazaq Times”