"Nwr Otan" partiyasınıñ hatşısı qızmetine jaña tağayındalğan Ğabidolla Äbdirahımov. Foto: nurotan.kz

Şımkenttiñ äkimi endi "Nwr Otan" partiyasınıñ hatşısı qızmetin atqaratın boldı. Bwl turalı partiyanıñ baspasöz qızmeti habarladı. 

"Nwr Otan" partiyasınıñ Törağası Nwrswltan Nazarbaevtıñ kelisimi boyınşa partiya Törağasınıñ Birinşi orınbasarı Mwhtar Qwl-Mwhammed Ortalıq apparat wjımına partiyanıñ jaña hatşısı Ğabidolla Äbdirahımovtı tanıstırdı. Al bwğan deyin osı qızmette bolğan Zauıtbek Twrısbekov basqa qızmetke auıstı", - delingen baspasöz habarlamasında.

Ayta keteyik, Zauıtbek Twrısbekov mausım ayında Prezident şeşimimen  Düniejüzi qazaqtarı qauımdastığı Törağasınıñ birinşi orınbasarı qızmetine tağayındalğan bolatın.

Äbdirahımov Ğabidolla Rahmatollawlı 1975 jılı 23 qañtarda Oñtüstik Qazaqstan oblısında düniege keldi. Ekonomist jäne memlekettik äkimşilik basqaru mamandıqtarı boyınşa joğarı bilim alğan. Ğ.Äbdirahımov "Nwr Otan" partiyasınıñ hatşısı qızmetine tağayındalğanğa deyin Şımkent qalasınıñ äkimi boldı.

Äbdirahımov köpşiliktiñ esinde köp qalğan äkimderdiñ biri. Öytkeni ol birde velosipedpen jürip, salauattı ömir saltın wstansa, endi birde qızmetkerlerinen avtobuspen jürudi talap etken jäne özi de köpşilikpen birge qoğamdıq kölikke otırğan bolatın. Äri "Şımkent qalası eñ iri megapolis boladı" degen de osı Ğabidolla Äbdirahımov edi.

“The Qazaq Times”