شىمكەنتتىڭ اكىمى ەندى "نۇر وتان" پارتياسىنىڭ حاتشىسى قىزمەتىن اتقاراتىن بولدى. بۇل تۋرالى پارتيانىڭ ءباسپاسوز قىزمەتى حابارلادى. 

"نۇر وتان" پارتياسىنىڭ توراعاسى نۇرسۇلتان نازارباەۆتىڭ كەلىسىمى بويىنشا پارتيا توراعاسىنىڭ ءبىرىنشى ورىنباسارى مۇحتار قۇل-مۇحاممەد ورتالىق اپپارات ۇجىمىنا پارتيانىڭ جاڭا حاتشىسى عابيدوللا ءابدىراحىموۆتى تانىستىردى. ال بۇعان دەيىن وسى قىزمەتتە بولعان زاۋىتبەك تۇرىسبەكوۆ باسقا قىزمەتكە اۋىستى", - دەلىنگەن ءباسپاسوز حابارلاماسىندا.

ايتا كەتەيىك، زاۋىتبەك تۇرىسبەكوۆ ماۋسىم ايىندا پرەزيدەنت شەشىمىمەن  دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى قىزمەتىنە تاعايىندالعان بولاتىن.

ءابدىراحىموۆ عابيدوللا راحماتوللاۇلى 1975 جىلى 23 قاڭتاردا وڭتۇستىك قازاقستان وبلىسىندا دۇنيەگە كەلدى. ەكونوميست جانە مەملەكەتتىك اكىمشىلىك باسقارۋ ماماندىقتارى بويىنشا جوعارى ءبىلىم العان. ع.ءابدىراحىموۆ "نۇر وتان" پارتياسىنىڭ حاتشىسى قىزمەتىنە تاعايىندالعانعا دەيىن شىمكەنت قالاسىنىڭ اكىمى بولدى.

ءابدىراحىموۆ كوپشىلىكتىڭ ەسىندە كوپ قالعان اكىمدەردىڭ ءبىرى. ويتكەنى ول بىردە ۆەلوسيپەدپەن ءجۇرىپ، سالاۋاتتى ءومىر سالتىن ۇستانسا، ەندى بىردە قىزمەتكەرلەرىنەن اۆتوبۋسپەن ءجۇرۋدى تالاپ ەتكەن جانە ءوزى دە كوپشىلىكپەن بىرگە قوعامدىق كولىككە وتىرعان بولاتىن. ءارى "شىمكەنت قالاسى ەڭ ءىرى مەگاپوليس بولادى" دەگەن دە وسى عابيدوللا ابدىراحىموۆ ەدى.

“The Qazaq Times”