№863 saylau uçaskesindegi saylauşı. 25 şilde 2021 jıl. Almatı oblısı, Talğar audanı, Besağaş auılı. Foto: QT / Kültegin Aspanwlı

Qazaqstanda alğaş ret ötkizilgen auıl äkimderin saylau qorıtındısın Ortalıq saylau komissiyasınıñ ornına bilik basılımı jariyaladı. «Kazpravda» gazetinde jarıq körgen resmi nätijege säykes, saylauda köbine «Nwr Otan» kandidattarı men memlekettik qızmetkerler jeñgen.

25 şildede Qazaqstannıñ 14 oblısındağı 2346 äkimniñ 31%-ın saylau nauqanı ötti. Aldağı tört jılğa saylanğan 730 äkimniñ arasında negizinen «nwrotandıqtar» men «memqızmetkerler» ekenin bayqauğa boladı. 2297 kandidattıñ arasında 730-ı äkim ornına qayta nemese jañadan jayğastı.

Qalğan 45 äkim osı jıldıñ soñına deyin saylansa, özge 1571-i endigi jılı ötedi.

Saylau qorıtındısına qarağanda, Türkistan men Qarağandı oblısında öz-özin wsınğandar arasında salıstırmalı türde jeñgender köbirek.

Almatı oblısında jurnalisti quıp, «byulleten' wrlığın» bürkemelegen saylau

Redakciya tapsırmasımen barğan QT jurnalisi PTR testiniñ qorıtındısı joq degen uäjben saylau uçaskesinen quılğan Almatı oblısında 71 äkim saylandı. Onıñ 60-ın sayasi partiyalar jäne 11-i özin-özi wsınğan kandidattar. 16 audannan 225 ümitker äkim ornına talastı. Jeñimpazdardıñ 39-ı, yağni jartısınan astamı bwrınğı äkimder. Jalpı saylanğan 71 äkimniñ 53-i memlekettik qızmetkerler qatarında bolğan.

25 şilde 10 şaqtı uçaskeden baqılauğa, aqparat taratuğa tırısqan QT redakciyası halıq belsendiliginiñ öte tömen bolğanına köz jetkizgen. Mäselen, tilşi barğan 863-868 arasındağı altı saylau uçaskesindegi azamattardıñ belsendiligi 4,68%-dı körsetti. Al redakciyağa ayaq bastırmağan jäne jete almağan uçaskelerde resmi hattamanıñ qorıtındısında el «öte belsendi qatıstı» delingen. Saylau ayaqtalardan jartı sağat bwrın 200 şaqtı adam keldi degen №844 saylau uçaskesi resmi esepte 2 mıñğa juıq adam bolğanı turalı aqparat berdi. Tilşi №843 saylau uçaskesiniñ dauıs jäşiginen birneşe byulletenniñ bumasın kördi, atı-jöniniñ twsına qol qoyılıp, dauıs beru qwqığınan ayırılğan birneşe saylauşımen tildesti. Fal'sifikaciya jağdayı tikeley efirde bolğanına qaramastan, Talğar audandıq policiya basqarması jäne aumaqtıq saylau komissiyası eşqanday şara qoldanbadı. Policiya aqparat qwralınıñ arızın qarausız qaldırğan.

Sarapşılar men täuelsiz bayqauşılar 222 mıñğa juıq saylauşısınıñ 67,5%-ı ğana qatısıp, respublika boyınşa eñ soñğı orınğa jayğasqan Almatı oblısında şın mäninde jağday birneşe ese kem bolğanın aytadı.

Özge öñirler...

Resmi mälimetti öñirler boyınşa taratıp aytsaq, Aqtöbe oblısında 35 äkim saylanğan. Saylau qorıtındısı boyınşa, «Nwr Otannıñ» – 28 kandidatı, «Auıldıñ» – 2, «Aq jol», «Adal», «Qazaqstannıñ halıq partiyasınıñ» ärqaysınan bir kandidattan jeñgen. Mwnda öz-özin wsınğan eki adam jeñiske jetken.

Türkistan oblısında 60 auıl äkimi saylanğan. «Nwr Otannıñ» – 41 kandidatı, «Auıldıñ» – 1, «Adaldıñ» bir kandidatı jeñgen. Mwnda öz-özin wsınğan 17 adam jeñiske jetken. Bwl respublika boyınşa eñ joğarı körsetkiş bolsa kerek.

Atırau oblısında saylanğan 18 äkimniñ 15-i – «Nwr Otandıkı», bireui – «Adal» partiyasınıñ müşesi. Ekeui – öz-özin wsınğan.

Şığıs Qazaqstan oblısına jeñiske jetken 77 adamnıñ 60-ı – «Nwr Otan» kandidatı. 11 adamdı – «Auıl» wsınğan, ekeui – «Adal», bireui – «Aq jol», bireui – «Qazaqstannıñ halıq partiyasınıñ» müşesi. Ekeui – öz-özin wsınğan.

Jambıl oblısında «Nwr Otannıñ» 31 kandidatı, «Auıldıñ» – 1, «Aq joldıñ» – 1, «Qazaqstannıñ halıq partiyasınıñ» bir müşesi jeñiske jetken. Mwnda öz-özin wsınğan üş adam jeñiske jetken.

Batıs Qazaqstan oblısında «Nwr Otannıñ» – 22 kandidatı, «Auıldıñ» – 1, «Jalpıwlttıq social-demokratiyalıq partiyasınıñ» 1 müşesi jeñiske jetken. Öz-özin wsınğan jeti adam köp dauıs jinağan.

Qarağandı oblısında «Nwr Otannıñ» 56 kandidatı, «Auıldıñ» – 3, «Aq joldıñ» – 1, «Adaldıñ» bir kandidatı jeñiske jetken. Mwnda jeñgender arasında öz özin wsınğan 14 kandidat bar.

Qostanay oblısında «Nwr Otannıñ» – 52 kandidatı, «Auıldıñ» – 2, «Aq joldıñ» – 2, «Adaldıñ» eki kandidatı jeñiske jetken. Mwnda jeñgender arasında öz özin wsınğan 7 kandidat bar.

Resmi aqparat boyınşa, Qızılorda oblısında partiyalar wsınğan 35 adam jeñgen. 30-ı – «Nwr Otandıkı». Mwnda öz-özin wsınğan 75 adamnıñ beseui auıl äkimi saylauında köp dauıs alğan.

Pavlodar oblısında «Nwr Otannıñ» 34 kandidatı jeñgen. «Auıldıñ» – 2 adamı, «Aq joldıñ» – 1, «Adaldıñ» bir kandidatı jeñiske jetken. Öz-özin wsınğan 6 äkim jeñgen.

25 şildede Qazaqstanda auıl äkimin saylau ötken. Biıl zañnamağa engizilgen özgertulerge säykes, alğaş ret auıl äkimin halıqtıñ özi saylaydı. Bilik mwnı «demokratiyağa bastaytın ülken özgeris» dep atasa, sınşılar «kandidattarğa birdey jağday jasalmağan, täuelsiz kandidattarğa kedergi köp» degendi alğa tartqan.

Aymaqtağı belsendiler men baqılauşılardıñ aytuınşa, kandidattarğa qoyılğan memlekettik qızmette kemi bir jıl nemese qoğamdıq wyımdı keminde 2 jıl basqarğan adam ğana ümitker bola aladı degen talap jwrt ömirin jaqsartqısı kelgen köp isker azamattıñ jolın baylağan. Osığan deyin äkimdikte nemese memqızmette istegender ğana äkim bola boluı kerek degen talap kandidat bolğısı keletin adamdardı azaytqanğa wqsaydı. Öytkeni şağın auıldarda auıl äkimi men äkimdiktegi birer qızmetten özge memlekettik qızmet joq.

“The Qazaq Times”