Foto: The Fiscal Times

Fillipinde memleket basşısınıñ jariyalauımen jürip jatqan "esirtkige qarsı soğıs" kampaniyasınıñ ayasında policiya qolınan qaza tapqan 17 jastağı Kian Loyd de Santostıñ oqiğası bükil eldi dürliktirgeni turalı aldın jazğan bolatınbız. Bügin Fillipinniñ Prezidenti Rodrigo Duterte esirtkige qarsı sayasattıñ qwrbanı bolğan jas jigittiñ otbasına köñil ayttı. Bwl turalı Reuters aqparattıq agenttigi jazdı. 

Aza twtıp otırğan ata-ananı öziniñ resmi qabıldauına şaqırğan Rodrigo Duterte olarğa ädilettilik ornatıp, juıq arada kinälilerdi jazalauğa uäde berdi. Kian Loyd de Santostıñ anası Lorenca Prezidenttiñ sözderi köñilge medeu bolğanın aytsa, äkesi memleket basşısınıñ özi tikeley qoldau körsetip otırğanda, eşqanday ädiletsizdikten qorıqpaytının jetkizdi.

Osı uaqıtqa deyin mıñdağan adamdı sottıñ şeşimin kütpey-aq abaqtığa jauıp, oqiğa ornında öltiruge rwqsat beretin naşaqorlıqqa qarsı küres kampaniyasına aşıq narazılıq bolmağanımen, senbi küni jas balanıñ jerleu räsimine jinalğan halıq qala köşelerine qoldarına Duterteniñ sayasatına qarsılıq bildiretin mätindegi paraqşalar wstap, şeruge şıqtı.

Rodrigo Duterte qwqıq qorğau qızmetkerlerimen kezdesu kezinde, bwrınğışa olarğa qolğa tüsiru operaciyasına qarsılıq tanıtqan azamattarğa qarsı qaru qoldanuğa rwqsat beretinin aşıp ayttı. "Biraq barlıq operaciyalar zañnıñ talaptarın saqtap, ädiletsizdikterge jol berilmesin!", - dep eskertti.

“The Qazaq Times”